Bu gün Seulda biznes-seminar keçirilir ki, bu seminar çərçivəsində Azərbaycanın investisiya imkanları təqdim olunacaq. Bu barədə Trend ə Azərbaycan investisiya ixracı və rəğbətləndirilməsi fondu (AZPROMO) xəbər verib. Tədbirin təşkilatçıları Koreyanın Ticarət, Sənaye və Energetika Nazirliyi, Koreyanın Ticarət-sənaye palatası, AZPROMO və Azərbaycanın İqtisadi İnkişaf Nazirliyidir.
Birgünlük seminar zamanı Koreyanın işgüzar dairələri Azərbaycandakı sərmayə iqlimi ilə, ticarət və sənaye, informasiya texnologiyaları, tikinti və enerji sahəsində əməkdaşlıq üçün potensial imkanlarla tanış olacaqlar.
Təqdimatı AZPROMO-nun başçısı Emil Məcidov aparacaq, həmçinin AZPROMO-nun sərmayələrin rəğbətləndirilməsi üzrə direktoru Anar Quliyev, sahibkarlığın inkişafı departamentinin başçısı Samir Nuriyev və İqtisadi İnkişaf Nazirliyinin sərmayə və beynəlxalq münasibətlər şöbəsinin başçısı Elşən Məmmədzadə çıxış edəcək.
Səfər zamanı Tikinti və Nəqilyyat, İnformasiya və Kommunikasiya, Ticarət, Sənaye və Energetika Nazirliklərinin nümayəndələri, həmçinin Koreyanın bəzi transmilli korporasiyaları ilə işgüzar görüşlərin keçirilməsi planlaşdırılıb. Təqdimat avqust ayında Azərbaycanda keçirilməsi planlaşdırılan Azərbaycan-Koreya iqtisadi forumla əlaqədar keçirilir. Bununla əlaqədar iyun ayında Kommersiya, Sənaye və Energetika Nazirlik nümayəndələrindən ibarət nümayəndə heyəti Bakıda olub.
2006-cı ilin may ayında Bakıda birinci Azərbaycan-Koreya biznes-forumu keçirilib. Bu forumda Koreyadan təxminən 200 sahibkar, rəsmi şəxs iştirak edib. Forum çərçivəsində AZPROMO və Koreyanın ticarət- sənaye palatası arasında əməkdaşlıq haqqında saziş imzalanıb.