Almaniyanın KFW bankı və Azərbaycan höküməti AzSES - İmişli elektrik ötürücü xəttinin tikinti layihəsi üzrə kredit şərtlərinin razılaşdırılmasını tamamlayır. KFW bankının Bakı ofisinin başçısı Natiq Abdullayevin Trend ə verdiyi xəbərə görə, kredit razılaşması üzrə danışıqlar iyunda başlayıb, lakin kredit üzrə faiz dərəcələri hələ də razılaşdırılmayıb. Alman bankı ilk dəfədir ki, Azərbaycan layihəsini yarımkommersiya şərtləri ilə maliyyələşdirir.
N.Abdullayev hesab edir ki, yarımkommersiya kreditinin faiz dərəcəsi AYİB, DB (BYİB) faiz dərəcələri ilə rəqabət apara biləcək. Bank üç variant təklif edib: dəyişən faiz dərəcəsi (euro/libor), təsbit edilmiş faiz dərəcəsi (euro/libor) və ödəniş tarixi üzrə təsbit edilmiş faiz dərəcəsi. Maliyyə Nazirliyində belə hesab edirlər ki, indiki şəraitdə dəyişən faiz dərəcəsinə üstünlük vermək risklidir, çox güman ki, imzalanma anı üçün təsbit edilmiş faiz dərəcəsi seçiləcək. Lakin hələ bu məsələ açıq qalıb.
Kreditin digər şərtləri məlumdur, kredit 2 il güzəşt dövrü ilə 12 il müddətinə veriləcək. Federal Almaniya hökümətinin enerji təchizatı və elektrik enerjisindən effektiv istifadə üzrə fondu tərəfindən qrant təqdim edildiyindən bu enerji layihəsinin şərtləri yumşaldılıb. Bunun nəticəsində bankın maliyyələşdirməsinin bir hissəsi qrantdan ibarətdir, əks halda, kredit 8-10 il müddətinə və yüksək faiz dərəcəsi ilə veriləcəkdi.
Bank layihənin maliyyələşdirilməsi üçün 30 milyon avro ayırıb və bununla da layihənin bütün dəyərini ödəyib.
Layihədə AzSES-dən İmişliyə qədər 195 km uzunluqlu elektrik ötürücü xəttlərin tikintisi nəzərdə tutulub. Həmçinin Goranboyda yarımstansiyanın tikintisi və ayrıca 330 kVt gücə malik İmişli yarımstansiyasında elektrik enerjisinin verilmə sahəsinin genişləndirilməsi planlaşdırılıb.