Azərbaycan Dövlət Dəmir Yolu (ADDY) şimal istiqamətindən gələn neft yüklərinin qəbulunu hələ bərpa etməyib. Bu, onunla izah olunur ki, yük daşınmalarının artması nəticəsində ADDY lokomotiv parkı çatışmazlığı ilə üz-üzə qalıb. Bu barədə Trend ə Nəqliyyat Nazirliyindən məlumat veriblər.
Nazirliyin nümayəndəsi bildirib ki, bu il dəmir yolu ilə yük daşınmaları kəskin artıb. Bu, həm daxili, həm də tranzit yüklərinə aiddir. ADDY idarəsinin məlumatlarına əsasən, I yarım ildə yük daşımalarının həcmi 15,1 mln. ton təşkil edib ki, bu da planlaşdırılmış həcmdən 3,3 mln. ton çoxdur. Bu müddət ərzində daşınmış yüklərin 4 mln. tonu neft və neft məhsullarının payına düşür.
Bu il artım bütün yük növlərinin daşınmasında qeydə alınıb. Bundan əlavə, Ukrayna borularının Türkmənistana, eləcə də Türkmənistan neft məhsullarının Azərbaycan ərazisi vasitəsilə Batumi limanına daşınması haqqında müqavilələrin icrasına başlanıb.
Hazırda Azərbaycandan Batumi limanına həmçinin ABƏŞ tərəfdaşlarının da nefti nəql olunur. ABƏŞ-in Bakı-Novorossiysk marşrutundan istifadəsi Azərbaycanın öz neftinin neft emalı zavodlarına çatdırılan həcminin artımına, yəni neft məzsulları istehsalının gücləndirilməsinə gətirib çıxarır. Azərbaycan neft məhsulları üçün əsas xarici alıcı və tranzit ölkə Gürücstandır.
Sentyabr ayından etibarən ABƏŞ Azeri Light neftinin dəmir yolu ilə Batumi limanına daşınmasını dayandırmaq niyyətindədir. Bu, BTC kəmərinin istismara verilməsilə bağlıdır. Sentyabr ayına qədər BTC Co şirkəti BTC kəmərinjəki işləri başa çatdırmağı planlaşdırır ki, bu da əvvəllər Batumiyə ixrac olunan neftin kəmərlə nəqlinə şərait yaradacaq. Bu il Batumiyə ayda orta hesabla təxminən 430 min ton Azeri Light nefti nəql olunub.
Lokomotiv parkı ilə bağlı problemlərdən başqa, Batumi limanında da problemlər var. Batumi limanı əlverişli yay mövsümünə baxmayaraq, bu qədər həcmdə neftin daşınmasının öhdəsindən gəlmir.
İyulun ortalarında ADDY-nin "Uraltreyd" və "Dorteks-komplekt" şirkətlərindən aldığı 5 yeni lokomotiv Bakıya gətirilib. Hər bir lokomotivin dəyəri 2 mln. AZY təşkil edib, lakin nəqliyyat naziri Ziya Məmmədovun sözlərinə görə, hazırda lokomotiv parkının müasirləşdirilməsinin vaxtı çatıb. Park ehtiyatlarının 80%-i sərf edib.
Rusiya Dəmir Yolu idarəsinin rəhbəri Vladimir Yakunin bildirib ki, şirkət MDB limanları istiqamətində neftin göndərilməsi üçün vaqon çatışmazlığı ilə üzləşdiyindən həmin vaqonların təcili qaytarılması rejimi bəyan edib.
"Hazırda Rusiya-Azərbaycan sərhədində vəziyyət mürəkkəbdir. Yük axını böyük sürətlə artır, biz vaqon qıtlığı yaşayırıq" - deyə V.Yakunin qeyd edib. Onun sözlərinə görə, hazırda Rusiyanın hüdudlarından kənarda 2 min vaqon var və buna görə təcili qaytarılma rejimi elan olunub, lakin bu günə kimi Rusiya cəmi 200 vaqon alıb.
V.Yakunin deyib ki, vaqonların qaytarılması məsələsi MDB-nin dəmir yolu nəqliyyatı üzrə şurası çərçivəsində müzakirə olunur və yaxın vaxtlarda həll olunmalıdır.
ADDY-nin iyulun 24-nə olan məlumatına əsasən, neft və neft məhsulları ilə doldurulmuş 2 276 vaqon Batumi limanında və limana çatmaq üzrə olub. Bunun 796-sı mazut və 688-i xam neft ilə doldurulub. Qalan vaqonlar müxtəliv neft məhsulları daşıyıb.