Ölkədə özəlləşdirmə prosesinin başlandığı vaxtdan- 1997-ci ildən bu günə qədər 92 ixtisaslaşdırılmış çek hərracı keçirilib. Hərracların nəticələrinə görə, təxminən 480 səhmdar cəmiyyətin müəyyən miqdarda səhmləri satılıb. Dövlət Əmlakının İdarə Edilməsi üzrə Dövlət Komitəsindən Trend ə verilən xəbərə görə, bu dövr ərzində təxminən 50% özəlləşdirmə çeki hesabdan silinib. Dövriyyədən çıxarılmış çeklərin ümumi sayı daha çox idi, lakin ötən il dövlət vaxtında çek almayanlara əlavə çeklər payladı.
2006-cı ildə artıq üçüncü ixtisaslaşdırılmış çek hərracı başa çatdı (sayca 92-ci). Hərrac iyulun 18-22-də keçirilib. Bu hərraclara altı səhmdar cəmiyyətin səhmləri çıxarılıb. Onlardan yalnız biri Bakıda, qalanları isə bölgələrdə (Bərdə, İmişli, Neftçala, Şəki və Mingəçevir) yerləşir. Üç müəssisə tikinti sektorunda, qalanları isə kənd təsərrüfatı, sənaye istehsalatında fəaliyyət göstərir.
