Avqustun sonuna qədər Azərdəmiryolbank Avropa Yenidənqurma və İnkişaf Bankının (AYİB) $5 mln. həcmində kredit xəttini mənimsəməyə başlayacaq. Azərbaycan bankının idarə heyətinin sədri Roman Əmircanovun Trend ə verdiyi məlumata əsasən, səhmdarlar böyük həcmdə borca icazə verdikdən sonra bank kredit ehtiyatlarının istifadəsinə başlayacaq. Səhmdarların məsələylə bağlı iclası avqustun 19-na təyin olunub.
Lakin Azərdəmiryolbank artıq öz vəsaitləri hesabına layihələrin maliyyələşdirilməsinə başlayıb.
AYİB ilə Azərdəmiryolbank arasında kredit müqaviləsi 2006-cı ilin mayında imzalanıb. Müqaviləyə əsasən, vəsaitlər 5 illik müddətə ayırılır. $2 mln. mikro və kiçik sahibkarlığın kreditləşdirilməsinə, $3 mln. - kiçik və orta müəssisələrə kömək məqsədi üçün nəzərdə tutulub.
Bu gün həmin beynəlxalq maliyyə institutundan alınmış vəsaitlərin ümumi həcmi $12,5 mln. təşkil edir, o cümlədən $9,5 mln.- mikro, kiçik və orta müəssisələrə, $3 mln. - ticari maliyyələşdirmə proqramı çərçivəsində. Bundan əlavə, AYİB Azərdəmiryolbanka texniki kömək göstərir. Banklar arasındakı əməkdaşlıq 1997-ci ildən başlanıb.
AYİB 2005-ci ilin dekabrından Azərdəmiryolbankın səhmdarıdır. Onun bankın kapitalındakı payı 25% +1 səhmdir.
