Avqustun 14-17-də Bonnda (Almaniya) keçiriləcək Azərbaycan-Almaniya hökümətlərarası komissiyasının növbəti iclası çərçivəsində iki sənədin imzalanacağı gözlənilir. Bu barədə Trend ə İqtisadi İnkişaf Nazirliyindən xəbər verilib. Danışıqların yekununda protokol imzalanacaq.
İki ölkə höküməti arasında təbiətin regional mühafizəsi üzrə Proqram çərçivəsində qrantın verilməsini nəzərdə tutan maliyyə müqaviləsi imzalanacaq. Samur-Yalama milli parkının yaradılması üçün 2,55 mln. avro məbləğində qrantın ayrılması nəzərdə tutulub. Bu layihə üzrə müqavilənin imzalanması üçün səlahiyyətlər maliyyə naziri Samir Şərifova verilib.
Danışıqlarda ikitərəfli iqtisadi əməkdaşlıq məsələləri, imzalanmış texniki və maliyyə müqavilələri, eləcə də həyata keçirilən layihələr çərçivəsində indiki vəziyyət, gələcək layihələrin gerçəkləşmə perspektivləri müzakirə ediləcək. Həmçinin KFW Almaniya yenidənqurma bankının və GTZ Almaniya texniki yardım cəmiyyəti tərəfindən 2007-ci il üçün maliyyə və texniki yardımın həcminin dəqiqləşdirilməsi nəzərdə tutulur.
Almaniyadakı danışıqlarda iştirak edəcək Azərbaycanın nümayəndə heyətinə iqtisadi inkişaf naziri Heydər Babayev başçılıq edəcək. Nümayəndə heyətinə həmçinin İqtisadi İnkişaf, Maliyyə, Ədliyyə, Səhiyyə Nazirliklərinin nümayəndələri də daxil olacaq.
İndiyədək Azərbaycanın Almaniyaya göstərdiyi texniki yardımın həcmi 26 mln. avro, maliyyə yardımının həcmi isə 143 mln. avro təşkil edib.
