...

Azərbaycanda 400-dən artıq sosial obyekt özəlləşdirməyə açıq elan edilib

Biznes və iqtisadiyyat xəbərləri Materials 24 Avqust 2006 20:00 (UTC +04:00)

Trend-i buradan izləyin

Azərbaycan prezidentinin 23 avqust 2006-cı il tarixli sərəncamına əsasən səhiyyə, təhsil, mədəniyyət və idman sahələrində fəaliyyət göstərən 401 obyekt və müəssisə özəlləşdirməyə açıq elan edilib. Trend Dövlət Əmlakının İdarə Edilməsi üzrə Dövlət Komitəsinin məlumatına istinadən xəbər verir ki, bu obyektlərin özəlləşdirilməsi üçün əsas meyarlar onların profilinin saxlanması və əmək kollektivinin hüquqlarının qorunmasıdır.

Məlumatda qeyd olunub ki, özəlləşdirməyə açılmış dövlət müəssisələrinin fəaliyyət istiqamətlərinin saxlanması zamanı bu sahələrdə göstərilən xidmətlərə olan tələbatın ödənilməsi, xidmət səviyyəsinin müasir standartlara uyğunlaşdırılması, iş yerlərinin saxlanması və sosial sektorun inkişafı üçün məqsədyönlü sərmayələrin cəlb olunması əsas məqsədlərdəndir. Sosial xidmətlərin səciyyəviliyini nəzərə alaraq, həmçinin bu müəssisələrin peşəkar kadrlarının özəlləşdirmə prosesində fəal iştirakı üçün qanunvericilikdə nəzərdə tutulmuş zəruri tədbirlər həyata keçiriləcək.

Bu məqsədlə Dövlət Komitəsi müvafiq müəssisələrin xidmət göstərdiyi sahələrdə rolunun, həmin xidmətin əhali üçün nə dərəcədə vacib olmasının müəyyənləşdirilməsi üçün bir konkret hal üzrə zəruri təhlillər aparmaq fikrindədir.

Səhiyyə sahəsində 43 obyekt (onların arasında Respublika stomatologiya mərkəzi, Bakı Göz xəstəlikləri xəstəxanası, "Mərdəkan" sanatoriyası, Təsərrüfat hesablı Respublika uroloji xəstəxanası, Səhiyyə Nazirliyi yanında Diaqnostika mərkəzi və Reabilitasiya xəstəxanası), təhsil sahəsində 246 obyekt (sınaq-təcrübə zavodu, "Azərmaariflayihə" İnstitutu, təmir-tikinti idarələri, uşaq bağçaları və uşaq evləri (Bakı üzrə 113, ölkənin rayon və şəhərlərində 127)), Gənclər və İdman Nazirliyi yanında 4 obyekt (Sumqayıtda "Polad", Gəncədə "Metallurq", Gədəbəydə "Respublika" idman kompleksləri, Mingəçevirdə uşaq istirahət düşərgəsi) və Mədəniyyət və Turizm Nazirliyi yanında 108 obyekt (Bakıda fəaliyyət göstərən "Azərbaycan", "Araz", "İnqilab", "Təbriz", "Sevil", "İzmir", "N.Nərimanov", "Babək", "Şuşa"kinoteatrları, "Vətən" kinoteatrının yay zalının bir hissəsi, "Gənclik" Beynəlxalq turizm mərkəzi, "Azərnəşr", "Gənclik" və "Maarif" nəşriyyatları və s.) özəlləşdirmə üçün açıq elan edilib.

Xəbər lenti

Xəbər lenti