Azərbaycanda "quş qripi" virusunun olmasını müəyyən etmək üçün növbəti monitorinqin oktyabrın əvvəlində keçiriləcəyi gözlənilir. Bu barədə Trend ə Kənd Təsərrüfatı Nazirliyi yanında Dövlət Baytarlıq Xidmətindən məlumat verilib.
Monitorinq milli parklarda, qoruqlarda və köçəri quşlrın müvəqqəti olaraq məskunlaşa biləcəyi digər yerlərdə aparılacaq. Monitorinq zamanı quşçuluq və fərdi təsərrüfatlarda quşlardan qan analizləri götürüləcək və Respublika Baytarlıq Laboratoriyasında öyrəniləcək.
Əvvəlki monitorinq bu günlərdə başa çatıb və Abşeron, Salyan, Masallı, Lənkəran, Ağcabədi və digər ərazilərdə 36 köçəri quş və 2214 ev quşundan qan nümunəsi götürülüb. Yoxlamalar zamanı virusun əlamətləri aşkar olunmayıb.
Qeyd edək ki, Azərbaycanda "quş qripi" virusunun qarşısının alınması üzrə tədbirlərə cəlb olunmuş dövlət strukturları dəfələrlə elan edib ki, payız aylarında köçəri quşların uçub gəlməsi nəticəsində virus yenidən yayıla bilər.
