Milli Bank tərəfindən açıqlanmış ödəmə balansına əsasən, 2006-cı ilin birinci yarısında müsbət saldo 1,3 dəfə artaraq 539,3 mln. dollara çatıb ki, bu da ÜDM-in 6,8 %-ni təşkil edir. Bu barədə Trend xəbər verir.
Ödəmə balansında vəziyyətin yaxşılaşmasına yerli məhsula xarici tələbatın artması, ölkədə investisiya mühitinin yaxlılaşması ilə bağlı investisiya axını və dünya bazarlarında neftin bahalaşması kimi amillər təsir edib. Ödəmə balansının cari hesab saldosu da müsbət olub və 1 064,1 mln. dollar (ÜDM-in 13,4%-ni) təşkil edib.
Keçən illə müqayisədə xarici ticarət üzrə müsbət saldo 4,6 dəfə artaraq 3192,7 mln. dollara (ÜDM-in 40,4%-nə) çatıb ki, bu da cari əməliyyatlar üzrə mənfi saldonun müsbətə çatdırılması üçün əsas amil olub. Bu, kapital və maliyyənin hərəkəti hesabında yaranmış mənfi saldonun maliyyələşdirilməsi nəticəsində ödəmə balansının birinci ümumi saldosudur ki, müsbət olub.
2006-cı ilin birinci yarısında xarici ticarət dövriyyəsinin ümumi həcmi keçən ilin yanvar-iyun aylarındakı göstəriciləri 54,3% keçərək 7,6 mlrd. dollar təşkil edib. Bu zaman 2,2 mlrd. dollar (ÜDM-in 28,1%-i) məbləğində mal idxalı, 5,4 mlrd. dollarlıq (68,4%) ixrac əməliyyatları həyata keçirilib. Keçən ilin analoji dövrü ilə müqayisədə ümumi ticarət dövriyyəsi 2,7 mlrd. dollar, idxal 0,1 mlrd. dollar, ixrac isə 2,6 mlrd. dollar artıb.
İlin birinci yarısında 123 ölkə ilə ticarət əlaqələri qurulub. Bu zaman ticarət dövriyyəsinin 15,4 %-i MDB ölkələrinin, 84,6%-i isə digər xarici ölkələrin payına düşür. İtaliya, Rusiya, Türkiyə, İsrail, Böyük Britaniya, İran, Almaniya, Qazaxıstan, Gürcüstan və Çinlə intensiv ticarət münasibətləri qurulub. Azərbaycanın ixrac-idxal əməliyyatlarının 82,2%-i bu ölkələrin payına düşür.
AMB-nin ödəmə balansının sektorlar üzrə apardığı təhlil göstərib ki, ötən illərdəki kimi, bu ilin birinci yarısında da neft-qaz sektorunda xarici iqtisadi əməliyyatlar üzrə müsbət saldo, qeyri-neft sektorunda isə mənfi saldo yaranıb.
