Azərbaycan Milli Bankı oktyabrın ortalarında "Mikromaliyyə təşkilatları haqqında" qanun layihəsini müvafiq dövlət orqanlarına təqdim etməyə hazırlaşır. Trend in xəbər verdiyi kimi, AMB-nin baş direktoru Rüfət Aslanlı jurnalistlərə bildirib ki, işçi qrupu artıq qanun layihəsi ilə bağlı dnışıqları başa çatdırıb və hazırda redaksiya işləri gedir.
R.Aslanlı hesab edir ki, bu sənəd Azərbaycanda mikromaliyyə təşkilatlarının fəaliyyətini genişləndirməyə imkan verəcək. Çünki vahid qanunverici baza yaradılacaq. İndiyədək ölkədə mikromaliyyə təşkilatlarının fəaliyyəti AMB-nin qaydaları və rəhbərliyi ilə tənzimlənirdi. Vahid sənədin yaradılmasında AMB-yə Asiya İnkişaf bankı dəstək göstərib.
R.Aslanlı güman edir ki, gələcəkdə onların fəaliyyətini dövlət tərəfindən güzəştlərin verilməsi və digər yardımların göstərilməsi stimullaşdıracaq.
Qanun layihəsi qəbul olunduqdan sonra normativ aktlar işlənib hazırlanacaq. Bu aktlarda mikromaliyyə təşkilatlarının nizamnamə kapitalına olan yeni normativ tələblər müəyyən olunacaq. Hazırda bunlar NK-da 20 mln köhnə manat dəyərində yaradılır ki, bu da gerçəkliyə uyğun gəlmir. Beynəlxalq təşkilatların tövsiyələrinə baxmayaraq, onların fəaliyyəti indi olduğu kimi məhdudlaşdırılacaq və bu təşkilatlar əhalinin əmanətlərini cəlb etmək hüququna malik olmayacaq.
