İkinci Azərbaycan-İtaliya biznes-forumu Bakıda keçiriləcək. Azərbaycan investisiya və ixracın təşviqi fondunun (AZPROMO) Trend ə verdiyi xəbərə görə, İtaliya tərəfi forumu Bakıda keçirmək istədiyini bildirib. Əvvəllər tədbirin oktyabr ayının birinci yarısında Milanda təşkil edilməsi nəzərdə tutulurdu.
Fonddan bildiriblər ki, hazırda forumun keçirilmə vaxtının dəqiqləşdirilməsi və bu tədbirdə iştirak etmək istəyən şirkətlərin siyahısının yaradılması üzrə danışıqlar aparılır. Tədbirin təşəbbüsçüsü qismində Azərbaycanın İtaliyadakı səfirliyi çıxış edib, lakin tədbirin təşkilində AZPROMO da iştirak edir.
İlk biznes-forum 2005-ci ilin yazında Romada Azərbaycan prezidentinin İtaliyaya səfəri çərçivəsində keçirilib. Forumun işində iştirak etmək üçün respublika biznes-dairələrindən 25 nümayəndədən ibarət qrup yola düşüb, İtaliya tərəfdən isə təxminən 150 iş adamı tədbirdə iştirak edib. Biznes-forumun yekununda bir neçə kommersiya sazişi imzalanıb.
