Almaniya İnkişaf Bankı KfW və Azərbaycan Maliyyə Nazirliyi Almaniya-Azərbaycan Fondunun (AAF) gələcək taleyi ilə bağlı konstruktiv danışıqlara başlayıblar. Bu barədə Trend ə KfW-nin Bakı ofisindən məlumat verilib. İlin sonuna kimi AAF-in meneceri - Beynəlxalq Əməkdaşlıq üzrə Əmanət Kassaları Fondu (SBFIC) ilə bağlanmış müqavilənin müddəti bitir. Əlavə vəsaitlərin olmaması səbəbindən isə onu uzatmaq mümkün deyil.
Bu vəziyyət həm də Azərbaycan hökumətinin kiçik və orta sahibkarlığın dəstəklənməsi üçün KfW-nin AAF vasitəsi ilə ayıracağı üçüncü tranşından imtina etmək niyyəti ilə bağlı yaranıb. Avqustun 14-15-də Bonnda aparılmış Azərbaycan-Almaniya hökumətlərarası danışıqlar zamanı Azərbaycanın İqtisadi İnkişaf Nazirliyi konsolidasiya olunmuş kreditin kommersiya hissəsindən imtina etməsi barədə açıqlama verib. Hökumətdə hesab edirlər ki, çətin ki, bunsuz KfW ölkəyə kreditin güzəştli hissəsini (5 mln. avro) ayırmağa razılıq versin.
AAF üçün konsolidasiya olunmuş kreditin ümumi məbləği 20 mln. avro təşkil edirdi ki, bunun da ödəniş möhləti 5 il olmaqla 10 il müddətinə və eurolibor+2% faiz dərəcəsi ilə ayrılması nəzərdə tutulurdu.
İmtinanın səbəbi isə dövlətin dövlət zəmanəti ilə xarici borcların cəlbi və onların özəl sektora verilməsi ilə bağlı yürütdüyü siyasətdir.
KfW-dən verilən məlumata görə, Maliyyə Nazirliyi ilə danışıqlar 2006-cı ilin sonuna kimi başa çatmalıdır və hal-hazırda AAF-ın gələcək fəaliyyəti ilə bağlı müxtəlif variantlar nəzərdən keçirilir.
AAF-ın yaradılması barədə saziş 1999-cu ildə imzalanıb, amma kreditlərin verilməsinə 2001-ci ilin mart ayından başlanıb. KfW AAF-a illik 0,75 faiz dərəcəsi ilə 10 ili güzəştli olmaqla 35 illiyə ümumi məbləği 8,7 mln. avro olan iki kredit ayırıb.
2001-ci ilin mart ayından Bank of Baku və UniBank, 2003-cü ilin yanvarından Parabank və "Respublika" bankı, 2004-cü ilin sentyabrından isə Azərdəmiryolbank vəAzəriqazbank AAF-ın tərəfdaşlarıdır.
