İqtisadi əməkdaşlıq üzrə Azərbaycan-Rumıniya hökümətlərarası komissiyanın ikinci toplantısı oktyabrın 10-na təyin olunub. Azərbaycanın Nazirlər Kabinetindən Trend ə verilən xəbərə görə, iclas Rumıniya prezidenti Trayan Baseskunun oktyabrın 10-11-də Azərbaycana səfəri çərçivəsində Bakıda keçiriləcək. Hazırda ekspert qrupu komissiya iclasının gündəliyi üzərində işləyir.
Azərbaycan tərəfdən komissiyanın həmsədri baş nazirin birinci müavini Yaqub Eyyubov, Rumıniya tərəfdən isə - nəqliyyat, tikinti və turizm naziri Radu Berçanodur.
İkinci görüş çərçivəsində müzakirə ediləcək başlıca məsələlər yenə də yanacaq-energetika kompleksi, nəqliyyat və b. sahələrdə ticari-iqtisadi əməkdaşlığın inkişafı olacaq. Həmçinin Rumıniya prezidentinin səfəri zamanı imzalanması planlaşdırılan sənədlər hazırlanacaq.
Komissiyanın ilk görüşü 2004-cü il oktyabrın 7-8-də Buxarestdə keçirilib.
2006-cı ilin yanvar-iyul aylarının yekunu üzrə Azərbaycan və Rumıniya arasında xarici ticarət dövriyyəsi ötən ilin analoji dövrü ilə müqayisədə 48% artaraq, 82,9 mln. ABŞ dolları təşkil edib. Bu dövr ərzində 79,725 mln. ABŞ dolları məbləğində ixracat əməliyyatları həyata keçirilib və artım 50,8% təşkil edib. İdxal isə cəmi 0,5% artaraq, 3,176 mln. ABŞ dollarına çatıb. Rumıniyadan AR-ə əmtəə nomenklaturasına bitki yağları, ağac, sal daşlar, qara metaldan məmulatlar, mebel və hissələr daxildir. Azərbaycandan xam neft, kerosin, izopropil və propil spirti, nastein (turşu), efir yağları, propilen, pambıq lifi ixrac olunub.
Ölkələr arasında hüquq bazası 1995-ci ildən formalaşmağa başlayıb və bu günə qədər 10 saziş imzalanıb.