Azərbaycan höküməti və Milli bank manatın möhkəmlənməsi templərinin sürətlənməsinə yol verməmək üçün artıq valyuta kütləsinin qarşısını almağa çalışırlar. Maliyyə naziri Samir Şərifov Trend ə bildirib ki, milli valyutanın möhkəmlənməsi ölkəyə neft-dollar axını ilə izah olunur.
Vergi ödəyiciləri onları dövlət büdcəsi qarşısında vergi öhdəliklərinin yerinə yetirilməsi üçün reallaşdırmalıdırlar. Eyni zamanda manat resurslarını əmək haqqının ödənilməsinə, daxili proqram və layihələrin həyata keçirilməsinə yönəltmək lazım gəlir. Bu halda valyuta bazarında dolların təklifi artır və təklifin artması nəticəsində qiymət dəyişir. Hazırda xarici valyutanın təklifi artıb və bu da dolların məzənnəsinin azalmasına təsir göstərir.
"Bununla əlaqədar biz, hökümət və AMB çalışırıq ki, bazarda dolların təklifi çox olmasın", - deyə nazir qeyd edib.
Beynəlxalq valyuta fondu milli valyutanın ABŞ dollarına nisbətən möhkəmlənmə templərinin gələcəkdə də qorunacağını proqnozlaşdırır. Digər ölkələrin Mərkəzi banklarından fərqli olaraq, AMB intervensiya vasitəsilə nizamlanma ilə üzən məzənnə siyasətini aparır.
2006-cı ilin yanvar-avqust aylarında bu cür siyasətin aparılması nəticəsində milli valyutanın məzənnəsi 4,1% möhkəmlənib, 2005-ci ilin analoji dövründə isə manat təxminən 5% bahalaşıb. 8 ay ərzində Milli bankın valyuta bazarında iştirakı 418 mln. ABŞ dolları səviyyəsində olub.
