Oktyabrın 20-də Bakıda Azərbaycan və İtaliya iş adamlarının görüşü keçiriləcək. İqtisadi inkişaf nazirinin müavini Mikayıl Cabbarovun Trend ə verdiyi məlumata görə, İtaliyanın 8 aparıcı şirkət nümayəndələri Bakıya gəlib. Bu şirkətlərdən bir neçəsinin Azərbaycanda nümayəndəliyi də var.
Yaxın aylar ərzində İtaliyada Azərbaycan-İtaliya biznes-forumunun keçirilməsi planlaşdırılır. Nazir müavini 2006-cı ilin sonunadək işgüzar dairələrin görüşünün keçirilməsi mümkünlüyünü istisna etmir.
Birinci biznes-forum 2005-ci ilin yazında Romada Azərbaycan prezidentinin İtaliyaya səfəri çərçivəsində keçirilib. Bu forumun işində iştirak etmək üçün respublikadan bu ölkəyə işguzar dairələrin 25 nümayəndəsindən ibarət qrup yola düşmüş, İtaliya tərəfdən isə 150 iş adamı iştirak etmişdir. Biznes-forumun yekunları üzrə bir neçə kommersiya sazişi bağlanmışdır.