2007-ci il dövlət büdcəsinin sosial yönümlü xərcləri 2,2 mlrd. manat təşkil edəcək, bu isə bu ilin analoji xərclərindən 691 mln. manat və ya 47% çoxdur. Azərbaycan Maliyyə Nazirliyinin sosial sahələrin maliyyələşdirilməsi şöbəsinin müdiri Xaqani Rzayev Trend ə bildirib ki, ümumilikdə, gələn il bütün büdcə xərclərinin 77%-i sosial xərclərə yönəldiləcək.
Təqaüdün baza hissəsinin artırılması üçün gələn il dövlət büdcəsindən Əhalinin sosial müdafiəsi üzrə Dövlət Fonduna transfertlər 249 mln. manat təşkil edəcək, ünvanlı sosial yardım üçün 78 mln. manat nəzərdə tutulub. Büdcə paketində əmək qabiliyyətli əhali, bütün vətəndaşlar, təqaüdçülər və uşaqlar üçün dörd kateqoriya yaşam minimumu nəzərdə tutulub.
15 növ sosial müavinət üzrə orta hesabla 30-35% artım gözlənilir. Qaçqınlar üçün çörək pulunun 6 manatdan 8 manata qədər artırılması nəzərdə tutulub. Minimal əmək haqqının artırılması üçün 270 mln. manat nəzərdə tutulub və 630 mindən artıq şəxsi əhatə edəcək. Bu artım baza təqaüdünün artımı ilə paralel gedəcək. X.Rzayev qeyd edib ki, hökümətin əsas məqsədi onları yaşam minimumu səviyyəsinə çatdırmaqdan ibarətdir.
Əhalinin sosial müdafiəsi üzrə Dövlət fondunun (ƏSMDF) ilkin hesablamalarına görə, 1 sentyabr 2008-ci ilə qədər təqaüdün əsas hissəsi 60 manatdan çox, orta hesabla isə 75 manat olmalıdır.
1 oktyabr 2006-cı ildən etibarən təqaüdün əsas hissəsi 30 manatdan 35 manata qədər artırılıb. Sonrakı artımın 1 yanvar 2007-ci ildə olacağı gözlənilir və təqaüd 40 manata qədər, 1 iyul 2007-ci ildən isə - 45 manata qədər artırılacaq.