Daşınmaz əmlakın qeydiyyatı və kadastr üzrə vahid sistemin inkişafı ilə bağlı hazırki durumun qiymətləndrilməsi üçün "KfW" Almaniya İnkişaf Bankı Azərbaycana məsləhətçilər göndərməyi planlaşdırır. "KfW"in Bakı ofisinin başçısı Natiq Abdullayevin Trend ə verdiyi məlumata görə, Almaniya bankı analoji layihəni Azərbaycanda həyata keçirməyə hazırlaşan Dünya Bankı (DB) ilə fəaliyyəti uzlaşdırmaq niyyətindədir. Bununla əlaqədar olaraq səfər zamanı məsləhətçilər DB missiyası ilə birgə işləyəcəklər.
"Həmin məsləhətçilər 2 il bundan əvvəl hesabat hazırlayıblar və indi bu sənədi hazırki durumu öyrənməklə təhlil edəcəklər və bunun üçün DB ekspertləri ilə əlaqə saxlayacaqlar", - deyə N. Abdullayev bildirib.
"KfW" daşınmaz əmlakın qeydiyyatı və kadastr üzrə vahid sistemin inkişafı proqramı çərçivəsində həyata keçiriləcək tədbirlərə 2,5 mln. avro dəyərində güzəştli kredit və institusional təşkilatlar - benefisiar üçün 1 mln. avro məbləğində qrant ayırmağa hazır olduğunu bildirib.
"KfW" ofisinin başçısı hesab edir ki, adıçəkilən layihə $10-15 mln. tələb edir. Amma bank ayrılan vəsaitlər hesabına pilot layihəni gerçəkləşdirmək niyyətindədir. Pilot layihə, əvvəlcədən planlaşdırıldığı kimi, Bakını əhatə edəcək. Son məlumatlara görə, DB kadastrın yaradılması üçün $20 mln. ayrımağı planlaşdırır. Hərçənd bankın strategiyasında ölkə üçün $30 mln. ayrılıb.
