Azərbaycanın nümayəndəsi BMT-nin Ərzaq və Kənd Təsərrüfatı Təşkilatı (Food and Agriculture Organization of the United Nations FAO) və Çexiyanın Kənd Təsərrüfatı Nazirliyinin maliyyə dəstəyi ilə təşkil olunmuş beynəlxalq seminarda iştirak edib. Azərbaycanın Kənd Təsərrüfatı Nazirliyinin Elmi-Aqrar Mərkəzindən Trend -ə verilən xəbərə görə. tədbirdə mərkəzin elmi-tədqiqat işlərinin koordinasiya şöbəsinin müdiri Zülfüqar Məmmədov iştirak edib.
Praqada "Transgenetik qarğıdalının nümunəsində bitki məhsullarının istehsalında biotexnologiyadan istifadə və idarəetmə" mövzusunda seminar keçirilib. Tədbirdə Şərqi Avropa və MDB-dən mütəxəssislər iştirak edib.
Transgenetik bitkilərdə başqa növ bitki və ya heyvanlardan köçürülmüş gen (və ya genlər) yaxşı işləyir. Bu, bitki resipientin insan üçün əlverişli olan yeni xassələrə, viruslara, herbisidlərə, ziyanvericilərə və bitki xəstəliklərinə qarşı dayanıqlığa malik olması üçündür. Bu cür genetik dəyişdirilmiş bitkilərdən alınan yeyinti məhsulları daha yaxşı dada, xarici görünüşə və çox saxlanma qabiliyyətinə malik ola bilər.
Dövlət strukturundan bildirilib ki, tədbirdə iştirakda əsas məqsəd transgenetik orqanizmlərin mexanizmləri və müəyyən edilmə yollarının öyrənilməsindən ibarətdir.
