Azərbaycan Dövlət Neft Fondu bütün qiymətli kağızlar portfelini saxlamaq üçün The Bank Of New York-a verməyə hazırlaşır. Bu barədə Trend xəbər verir. Bugünkü mətbuat konfransında ARDNF-in icraçı direktoru Şahmar Mövsümov bildirib ki, bu yaxınlarda kastodial xidmətlərin göstərilməsi üçün bağlanmış müqaviləyə əsasən fonda bu xidmətlər göstəriləcək.
"Tenderin keçirilməsində başlıca məqsədlərdən biri qlobal kastodiuma keçid idi. Bu, əmanətlərin, vəsaitlərin, qiymətli kağızların idarə olunmasında səciyyəvi xidmətdir", - deyə fondun başçısı qeyd edib.
Ernst & Young tərəfindən Dövlət Neft Fondunun maliyyə vəziyyəti üzrə hesabata əsasən, 31 dekabr 2005-ci ildə ARDNF-in qiymətli kağızlarda investisiya portfeli 2 520,278 mlrd. manat (fondun ümumi aktivlərinin 39,2%-i) təşkil edib. ARDNF aktivlərinin qiymətli kağızlara qoyuluşunun maksimal müddəti 2014-cü ilə qədər nəzərdə tutulub.
The Bank Of New York dünyada kastodial xidmətlərin göstərilməsi üzrə aparıcı bankdır və bu xidmətlər üzrə o, 12 trln. ABŞ dolları məbləğində vəsaitə malikdir. Bankın fəaliyyəti dünyanın 100 bazarını əhatə edir.
