Azərbaycan Maliyyə Nazirliyi Hacıqabuldan Gürcüstan sərhədinə qədər avtomagistralın iki zolaqdan dörd zolağa qədər genişləndirilməsi layihəsi üçün kreditin şərtlərinin yumşaldılması məqsədilə Fransanın BNP Paribas bankı ilə danışıqları davam etdirməyi planlaşdırır. Ölkənin Nazirlər Kabinetindən Trend ə verilən məlumata görə, BNP Paribas tərəfindən təqdim olunan kredit Yaponiya Beynəkxalq İnkişaf Bankından (JBIC) alınacaq. Vəsaitlərin Yaponiya bankından birbaşa cəlb olunması Azərbaycana daha ucuz başa gələcək.
JBIC bankının Rusiya və MDB üzrə nümayəndəliyin başçısı Keneçiro Hayaşi və JBIC departamentinin direktoru Yeşixiro Kumaqainin daxil olduğu bankın Azərbaycana bu yaxınlardakı səfəri zamanı həmin layihə əsas müzakirə mövzusu olub.
Nazirlər Kabinetində hesab edirlər ki, vasitəçi qismində Azərbaycan Beynəlxalq Bankı da çıxış edə bilər.
Bununla yanaşı, ölkənin Maliyyə Nazirliyində güman edirlər ki, BNP Paribas və JBIC maliyyələşdirmə şərtləri arasında fərq cüzidir, çünki Yaponiya bankı ilk dəfə ölkədən zəmanət ödənişi (sığorta qismində) tələb edib. Nəticədə fərq cəmi 0,2-0,3% təşkil edir. İndiyədək JBIC Azərbaycan layihələrini standart şərtlərlə - ödənişi 10 il gecikdirməklə illik 0,75% faiz dərəcəsi ilə 40 il müddətinə maliyyələşdirirdi.
Azərbaycan hökümətinə verilmiş kredit sazişinə əsasən BNP Paribas 3 il güzəşt dövrü ilə libor+2,1% faiz dərəcəsi ilə 13 il müddətinə kredit verəcək. Maliyyə Nazirliyində hesab edirlər ki, danışıqlar hələ tamamlanmayıb, ona görə də hələ faiz dərəcələrini azaltmaq olar.
BNP Paribas yol layihəsinə 300 mln. ABŞ dolları ayırmağa hazır olduğunu bildirib. Bu vəsaitlər Hacıqabuldan Yevlaxa qədər uzunluğu 184,8 km və Qazaxdan gürcü sərhəddinə qədər uzunluğu 38 km olan yolun hissələrinin maliyyələşdirilməsinə yönəldiləcək.
Nəqliyyat Nazirliyi TACIS proqramının texniki yardımı çərçivəsində hazırlanmış texniki sənədləşmə əsasında texniki-iqtisadi əsaslandırmanı hazırlayıb. Əvvəldən Hacıqabula qədər dördzolaqlı yol çəkilib, ona görə də magistralın qalan hissəsinin ona uyğunlaşdırılması planlaşdırılır.
Hacıqabuldan Gürcüstan sərhəddinə qədər ərazidə birinci kateqoriyalı 400 km yolun inşası üçün hazırda həmçinin Dünya bankı, Slovakiyanın İxrac bankının təklifləri də nəzərdən keçirilir.
