Azərbaycanın Nəqliyyat Nazirliyi yeni beynəlxalq ticarət limanının tikiləcəyi yeri ilkin olaraq müəyyən edib və bu məqsəd üçün Ələt qəsəbəsi seçilib. Nəqliyyat Nazirliyinin nəqliyyat siyasəti və iqtisadiyyat şöbəsinin müdiri Sədrəddin Məmmədov Trend ə bildirib ki, bu, ən böyük nəqliyyat qovşağının yerləşdiyi əlverişli yerdir. Genişləndirmə üçün imkanlar olduğundan gələcəkdə Ələtdə loqistika mərkəzləri inşa edilə bilər.
"Limanın layihə gücü artırılacaq. Liman beynəlxalq standartlara cavab verdiyindən, sərnişin daşımalarının əvvəlki yerdə saxlanması planlaşdırılır. Ticarət limanı və gəmiqayırma zavodları isə başqa yerə köçürüləcək", - deyə S.Məmmədov qeyd edib.
Hazırda bu layihənin maliyyələşdirilməsinə Yaponiya Beynəlxalq Əməkdaşlıq Bankı (JBIC) və sərmayə qoymağa hazır olduğun bildirən Cənubi Koreya maraq göstərir. Avropa Yenidənqurma və İnkişaf Bankı da bu cür təkliflə çıxış edib. S.Məmmədovun sözlərinə görə, hazırda təkliflər toplanır və daha sonra hökumət layihənin texniki-iqtisadi əsaslandırılmasını və maliyyə mənbəyini müəyyən edəcək.
