Dünya bankı 2006-cı ildə qeyri-neft sektorunun 7-8% səviyyəsində olacağını proqnozlaşdırır. Dünya Bankının Cənubi Qafqaz üzrə aparıcı iqtisadçısı Kristian Pitersenin mətbuat konfransında bildirdiyi kimi, belə gözləntilər kənd təsərrüfatında bəzi geriləmələrə əsaslanır. Bu barədə Trend xəbər verir.
Onun sözlərinə görə, Azərbaycanda son illərin statistikası göstərir ki, qeyri-neft sektorunda illik artım 13% təşkil edib. Bu, hətta ötən illər neft sektorunda olduğundan çoxdur.
Bankın kənd təsərrüfatı ilə bağlı narahatçılığı pambıq və taxıl istehsalı ilə bağlıdır. "Mən hesab edirəm ki, bu təbiidir, belə ki, azərbaycanlı fermerlər meyvə və tərəvəzlərdən başqa, tədricən bitkilərin daha çox gəlir gətirən növlərini istehsal etməyə başlayır və heyvandarlığa daha çox üstünlük verirlər. Kənd təsərrüfat məhsullarının bu növləri ölkənin ixrac bazarında böyük gəlir gətirə bilər", - deyə K.Pitersen hesab edir.
Onun sözlərinə görə, Azərbayxanda qeyri-neft sektorunun ixracı templəri kifayət qədər yaxşı artırır. 2005-ci illə müqayisədə, bu il qeyri-neft ixracının artım templərinin 30% səviyyəsində olacağı gözlənilir. Lakin hesablama zamanı ötən ilin qeyri-neft ixrasından Türkmənistana satılmış köhnə neft qurğularını çıxarmaq lazımdır. "Bu sahədə, o cümlədən kimya və başqa sənayelərdə müsbət tendensiyalar müşahidə olunur. Azərbaycana holland xəstəliyinin olması və ya daxil olması haqqında nə isə demək çətindir. Mən hesab edirəm ki, vəziyyəti nəzarətdə saxlamaq və hər rüb təhlil keçirmək lazımdır, eləcə də əvvəlcədən xəbərdarlıq sistemini hazırlamaq vacibdir. Bu sistemin qurulmasının üzərində bank hazırda ölkə höküməti və Milli Bankı ilə işləyir", - deyə DB nümayəndəsi qeyd edib.
