Azərbaycan Maliyyə Nazirliyi Dünya Bankına respublika üzrə torpaq kadastrının yaradılması layihəsinin qiymətləndirilməsi nəticələrinə yenidən baxmağı təklif edib. Maliyyə Nazirliyindən Trend ə verilən xəbərə görə, sonuncu qiymətləndirmədən sonra layihənin dəyəri, uyğun olaraq DB-nın kredit məbləği artıb.
Maliyyəçilər dövlət əmlakının idarə olunması üzrə Dövlət Komitəsi, torpaq və xəritəşünaslıq üzrə Dövlət Komitəsinin bəzi komponentlərinin likvidasiyası hesabına xarici maliyyələşmənin həcmini 40-50 mln dollardan 30 mln. dollara qədər azaltmağı təklif edirlər. Hökümət DB layihələri çərçivəsində bu dövlət orqanlarının həyata keçirməyi nəzərdə tutduğu bəzi təmir-tikinti işlərini daxili resurslar hesabına etməyi planlaşdırır.
Qabaqcadan verilmiş məlumatlara görə, 2007-ci ilin fevral-martında AR və DB arasında kredit müqaviləsi barədə rəsmi danışıqlar aparılacaq. Bankın Bakı təmsilçiliyində belə hesab edirlər.
DB-nın və Azərbaycan hökümətinin kredit payı rəsmi danışıqların gedişində razılaşdırılacaq. Bankın Direktorlar Şurasında kreditlərin təsdiqlənməsi 2007-ci ilin martında baş tutacaq.
DB layihəsi respublika üzrə bütün qeydiyyat sistemini əhatə edəcək, lakin onun çərçivəsində bir neçə pilot layihələri olacaq. Layihənin benefisiarı Nazirlər Kabineti yanında daşınmaz əmlak reyestri Dövlət Xidməti, torpaq və xəritəşünaslıq üzrə Dövlət komitəsi, Dövlət əmlakının idarə olunması üzrə dövlət komitəsi və ədliyyə nazirliyi müəyyənləşib. Layihənin çərçivəsində daşınmaz əmlakın qeydiyyatı, kadastr xəritələrinin hazırlanması və dövlət əmlakının idarəetmə sisteminin möhkəmləndirilməsi nəzərdə tutulur. Layihəyə qatılmış dövlət orqanlarında keyfiyyət səviyyəsinin yüksəldilməsinin təmini üçün informasiya texnologiyalarının inkişafı planlaşdırılır.