2006-cı ildə Azərbaycan və İran arasında ticarət dövriyyəsi 30%-ə qədər artıb. Trend IRNA-ya istinadən verdiyi xəbərə görə, İranın Azərbaycandakı səfiri Əfşar Süleymani yerli televiziyada çıxış edərkən bildirib ki, ölkələr ticarət dövriyyəsini 500 mln. ABŞ dollarına qədər artırıblar və bunun 370 mln. ABŞ dolları İrandan Azərbaycana ixracın payına düşüb.
Səfir iqtisadiyyat və ticarət sahəsində ikitərəfli münasibətlərin gələcək inkişafının zəruri olduğunu vurğulayıb.
Onun sözlərinə görə, İran şirkətləri Azərbaycan iqtisadiyyatına təxminən 300 mln. ABŞ dolları sərmayə qoyublar.
"İranın illik qeyri-neft ixracı təxminən 15 mlrd. ABŞ dolları təşkil edir. İran Azərbaycanın kənd təsərrüfatı və sənaye sektoruna sərmayə qoymağa qadirdir", - deyə o əlavə edib.
Energetika sahəsində qarşılıqlı münasibətləri vurğulayan səfir qeyd edib ki, ölkələr arasında enerji mübadiləsinin sayı, o cümlədən Naxçıvan Muxtar Respublikasına ixrac ildə 200 mVt təşkil edir, bu isə Mərkəzi Asiya ölkələrində elektrik ötürmə xətlərinin inşasından sonra 700-800 MVt artacaq.
"İran bu layihənin həyata keçirilməsi üçün 75 mln. ABŞ dolları ayırıb və bunun 50%-i artıq reallaşdırılıb. Layihə bu il hazır olacaq", - deyə səfir bildirib.
