Azərbaycan tərəfi 2007-ci ilin naviqasiya dövründə aprelin 15-dən noyabrın 15-dək RF-nin daxili sularından keçmək üçün icazənin alınması məsələsi üzrə Rusiya ilə danışıqları davam etdirir. Bu barədə Trend ə çərşənbə axşamı Azərbaycan Dövlət Xəzər Dəniz Gəmiçiliyindən məlumat verilib.
Rusiya tərəfinə artıq gəmilərin keçməsinin mümkün qrafiki göndərilib. Gəmiçilik bütün 28 quru mal gəmisinin keçməsi üçün icazə almaq niyyətindədir. Lakin icazələrin qəti sayı Rusiya tərəfindən asılı olacaq.
Hazırda Azərbaycan gəmilərinin Rusiyanın daxili sularından keçməsi üçün icazə ilə bağlı vəziyyət dəyişməz qalır. Belə ki, bir gəmi yalnız bir dəfə Xəzərdən keçə və geriyə - Qara dənizdə daimi iş yerinə qayıda bilər. Bu problemlərin həlli üçün Rusiyanın normativ-hüquqi aktlarında dəyişikliklərin edilməsi zəruridir.
2006-cı ildə gəmiçilik Rusiya hökumətindən 14 gəminin RF-nin daxili sularından keçməsi üçün 25 icazə alıb. İcazələrin ümumi sayından 11-i Xəzərə keçid, 14-ü isə Xəzərdən çıxış üçün nəzərdə tutulub.
Lakin icazələrin alınmasına baxmayaraq, Azərbaycan RF-nin daxili sularından keçmək üçün uzunmüddətli sazişin bağlanacağına ümid edir. Bu məsələnin həlli üçün Rusiyada yalnız Dəniz məcəlləsinin deyil, həm də mövcud qanunvericiliyin dəyişdirilməsi zəruridir.
Hazırda Azərbaycan gəmilərinin Rusiyanın daxili sularından bir dəfə keçməsinin qiyməti 20-25 min ABŞ dollarına başa gəlir. Rusiya gəmiləri analoji hərəkətə görə 5-6 min ABŞ dolları ödəyirlər. Beləliklə, Azərbaycan gəmilərinin keçməsi Rusiyanın kanal xidmətlərinə böyük fayda verir.