"Azərbaycan Respublikası hökuməti ilə Rusiya Federasiyası hökuməti arasında əmək miqrasiyası sahəsində əməkdaşlıq haqqında saziş" layihəsi yaxın aylarda dövlətlər arasında imzalanacaq. Bu barədə Trend ə Əmək və Əhalinin Sosial Müdafiəsi Nazirliyi Miqrasiya İdarəsinin rəisi Rauf Tağıyev məlumat verib.
O bildirib ki, bu saziş layihəsi artıq ötən ilin sonunda Rusiyada müvafiq dövlət qurumu ilə müzakirə edilib. Əməkdaşlıq sazişinin imzalanması isə yaxın zamanlarda baş tutacaq. R.Tağıyev qeyd edib ki, hər iki tərəf əmək miqrasiyası sahəsində qarşılıqlı və sivil qaydada yardımların, əməkdaşlığın baş tutmasında maraqlıdır. Nazirlik rəsmisinin sözlərinə görə, bu sənəd həm də Rusiyada miqrantların hüquqi statusuna dair yeni qanunun qüvvəyə minməsindən sonra orada yaşayıb işləyən azərbaycanlıların miqrasiya problemlərinə də yardım göstərəcək: "Biz istəyirik ki, həm Azərbaycan vətəndaşları Rusiyada əziyyətlərə düçar olmasın, həm də Rusiya hökuməti çətinə düşməsin".
