Azərbaycan,Bakı/müxbir Trend S.Babayeva/ECO üzv dövlətlərinin kənd təsərrüfatı nazirlərinin 5-7 mart tarixində Tehranda keçiriləcək III sammitində iştirak etmək üçün Azərbaycan Kənd Təsərrüfatı Nazirliyinin nümayəndə heyətinin tərkibi müəyyənləşib. Bu barədə bu gün Kənd Təsərrüfatı Nazirliyindən məlumat verilib.
Nümayəndə heyətinə kənd təsərrüfatı nazirinin müavini Bəhram Əliyev başçılıq edəcək. Nümayəndə heyətinin tərkibinə əkinçilik ETT-nin direktor müavini Möhtəsim Əhmədov və kənd təsərrüfatı iqtisadiyyatı ETT-nin direktoru Sadıq Salahov daxildir.
Tədbirdə ölkələr arasında aqrar sahədə əməkdaşlığın genişləndirilməsi, İran sahibkarlarının Azərbaycanın aqrar sahəsində həyata keçirilən layihələrdə iştirakının mümkünlüyü məsələləri müzakirə olunacaq.
Yanvarın sonunda İranın Azərbaycandakı səfiri Əfşar Süleymani Azərbaycanın kənd təsərrüfatı naziri İsmət Abbasova iranlı həmkarı Məhəmmədrza İsgəndərinin adından ECO üzv dövlətlərinin kənd təsərrüfatı nazirlərinin III sammitində iştirak etmək üçün dəvətnaməni təqdim edib.