Azərbaycan,Bakı/müxbir Trend İ.Xəlilova / Azərbaycanın İxrac və İnvestisiyaların Təşviqi Fondu (AZPROMO) Azərbaycanın investisiya imkanlarının təqdimatı məqsədilə Los-Ancelesə səfər müddəti planına dəyişiklik edib. AZPROMO-nun prezidenti Emil Məcidovun məlumatına əsasən, ilkin tarix Amerika kənd təsərrüfatı missiyasının Bakıya gözlənilən səfəri ilə əlaqədar dəyişdirilib. Lakin yekun müddət hələ də müəyyən edilməyib.
Amerika-Azərbaycan ticarət-sənaye palatası Amerikanın qida sənayesi və kənd təsərrüfatı üzrə ixtisaslaşmış lider şirkətlərinin 21-26 may tarixində Bakıya səfərini təşkil edir. AZPROMO bu dövrə qədər Azərbaycan şirkətlərinin ABŞ-a səfərini təşkil etməyi planlaşdırmışdı.
Missiya Azərbaycanın qida və kənd təsərrüfatı müəssisələrinə baş çəkəcək, bu sahənin nümayəndələri, həmçinin kənd təsərrüfatı və iqtisadi inkişaf naziri ilə görüşlər keçirəcək.
Ticarət-sənaye palatası həmçinin 23-25 mayda Bakıda keçiriləcək 13-cü "Inter Food Azerbaijan-2007" sərgisinin proqramına salınmış Azərbaycan-Amerika kənd təsərrüfatı biznes-forumunun sponsoru kimi çıxış edəcək.