Azərbaycan, Gəncə / Trend müxbir V.Məmmədov/ Ağstafa rayonunun icra başçısı Cümşüd Musayev bazar ertəsi jurnalistlərə açıqlamasında bəyan edib ki, rayonda yeni zənginləşdirilmiş vitaminli yem və alkonel istehsalı zavodu inşa edilir. Onun sözlərinə görə, zavod ildə 100 min tondan çox məhsul tədarük edə biləcək.
Musayev bildirib ki, müəssisənin tikintisinə ilkin olaraq 8 milyon manat vəsait ayrılıb və artıq vəsaitin 5,5 milyon manatı sərf olunub.
"Müəssisəni taxıl, çuğundur və digər bu kimi kənd təsərrüfatı məhsulları ilə təmin etmək üçün azı 22 min hektar torpaq sahəsi lazımdır" - deyə Musayev əlavə edib. Onun sözlərinə görə, zavodun inşasının gələn ilin sonunadək yekunlaşacağı planlaşdırılır.
Tam avtomatlaşdırılmış müəssisədə 420 nəfər daimi işçinin çalışacağı planlaşdırılıb.
Ağstafa paytaxt Bakıdan 460 kilometr qərbdə yerləşir.
