Azərbaycan, Bakı /müx. Trend İ.Xəlilova / Qazaxıstanın "TuranAlem" bankının direktorlar şurasının qərarı ilə qurumun Azərbaycandakı nümayəndəliyi ləğv olunub. Bu barədə rəsmi mətbuatda yer alan məlumatda bildirilir. Qeyd edək ki, sözügedən bank 2005-ci il iyunun 8-də Azərbaycanın Ədliyyə Nazirliyində Bakıdakı nümayəndəliynin açılmasını qeydiyyata aldırıb. Lakin Azərbaycanın Milli Bankı (AMB) bu strukturun fəaliyyət göstərməsi üçün rəsmi icazə verməyib. Yeni bank qanunvericiliyinə əsasən, bankın Azərbaycanda nümayəndəliyinin açılması üçün AMB-nin icazəsi tələb olunur.
Məhz bu səbəbə görə "TuranAlem"in hər hansı bir bankın iştirak payının alınması vasitəsi ilə Azərbaycanın bank sektorundakı fəaliyyətinə dair planları yubanırdı. "İcazə almayanədək kim təminat verə bilər ki, AMB bizə Azərbaycan bankının nəzarət paketini almağa icazə verəcək" - deyə hələ ötən il "TuranAlem"in Bakıdakı nümayəndəliynin rəhbəri Aida Sultanova bildirirdi. Bununla yanaşı o güman edirdi ki, problemlər olmamalıdır. Çünki AMB rəsmən bəyan edirdi ki, ölkənin bank sektorunda xarici investorları qarşılamağa hazırdır. "Düşünürəm ki, belə də olacaq. Nümayəndəliyin fəaliyyəti üçün icazəni isə yaxın zamanlarda alacağıq" - deyə Sultanova düşünürdü.
Məlumat üçün bildirək ki, "TuranAlem"in Bakıdakı nümayəndəliyinin açılış mərasimi 2005-ci ilin avqustunda keçirilib. AMB-nin icazəsini gözləyən qazaxlar paralel olaraq yerli banklarla iştirak payının alınması ilə bağlı danışıqlar aparıb. İlkin olaraq gözlənilirdi ki, "TuranAlem" hansısa bankın səhmlərinin 5-10 faizini alacaq və perspektivdə nəzarət paketini əlinə keçirəcək. Ən azı bankın nümayəndələri belə deyirdilər.
"TuranAlem" MDB ölkələrində fəaliyyətinin genişləndirilməsi planlarını müvafiq strategiya əsasında həyata keçirir. Cənubi Qafqazda bankın artıq Ermənistan və Gürcüstanda nümayəndəlikləri var. "TuranAlem" həmçinin Gürcüstanda yerli bankları almaq niyyətini açıqlayıb.
Bu günkü məlumatda bildirir ki, kreditorlar xəbərin rəsmi mətbuatda yerləşdirildiyi gündən iki ay müddətində banka öz tələblərini irəli sürə bilərlər. Ləğvetmə komissiyasının ünvanı: Bakı, Nizami 340, ISR Plaza, 4-cü mərtəbə, MWP Ltd şirkəti. Tel: 497-89-48.
