Azərbaycan, Bakı/müxbir Trend İ.Xəlilova/Azərbaycan hökuməti ilə əməkdaşlıq perspektivlərini müzakirə etmək üçün iyun-iyulda Bakıya Avropa Yenidənqurma və İnkişaf Bankı (AYİB) missiyasının səfəri gözlənilir. Bu barədə İqtisadi İnkişaf Nazirliyindən (İİN) məlumat verilib.
Bu həftə AYİB-in Kazanda işlər müdirlərinin illik iclası çərçivəsində iqtisadi inkişaf naziri bankın prezidenti Jan Lemyer və digər yüksək vəzifəli şəxslərlə görüşüb. J.Lemyer Azərbaycanla işləməkdən məmnunluğunu və işləri davam etdirməyə hazır olduğunu bildirib.
AYİB 2007-ci ildə Azərbaycan üzrə potrfeli artırmağı planlaşdırır. Bu barədə öncə Avropa Bankının Bakı nümayəndəliyinin rəhbəri Aygen Yaikoğlu bildirib. "2006-cı ildə olduğu kimi, bank müxtəlif sahələrdə - özəl, bank sahəsində layihələri maliyyələşdirmək niyyətindədir və əhəmiyyətli məbləğ ayırmağı nəzərdən keçirir", deyə Yaikoğlu bildirib.
Azərbaycanda fəaliyyətə başladığı ilk vaxtlardan Avropa Bankının maliyyə portfeli 1 mlrd. dollar təşkil edir, birgə maliyyələşdirilmiş layihələri nəzərə alaraq portfel 4 mlrd. dollara çatır. 2006-cı ildə AYİB Azərbaycan layihələrinin maliyyələşdirilməsinə 150 mln. dollar ayırıb. Nümayəndəlik rəhbərinin fikrinə görə, layihələrdən asılı olaraq bu il əvvəlki ilə nisbətən daha çox vəsait ayrıla bilər.
Hazırda Avropa Bankı yardımın göstərilməsi, ölkənin dəmir yolunun inkişafı, enerji sahəsində layihələr istiqamətində 7-8 bank, 10 kiçik müəssisə ilə işləyir. "Bizim nəzərimizdə həm 500 min dollar, həmçinin 100 mln. dollar məbləğində olan layihələrimiz var. Bankın strategiyasına yalnız vəsaitlərin ayrılması deyil, həmçinin səhmdar kapitalda iştirak daxildir. Biz yalnız bank, lizinq, sığorta sahələrində iştirakda deyil, həmçinin digər sahələrdə, həmçinin qeyri-neft sahələrində də iştirakda da maraqlıyıq", deyə Yaikoğlu bildirib. Onun fikrincə, Avropa Bankı digər investorlardan əlavə maliyyələşmənin cəlb olunması üçün katalizator ola bilər.