Azərbaycan, Bakı/ Trend müxbir İ.Xəlilova/ Dövlət Gömrük Komitəsi (DGK) və Xəzər işgüzar inteqrasiya klubu (CBIC) sahibkarların gömrük məsələləri ilə bağlı problemlərinin həll olunması üzrə klub çərçivəsində Şura yaradılması barədə razılığa gəlib. Bu barədə cümə günü CBIC prezidenti Telman Əliyev klub üzvlərinin DGK sədri Aydın Əliyevlə görüşündə məlumat verib. Onun sözlərinə görə, DGK CBIC-in təklifini qəbul edib və bu Şura sahibkarlar və gömrük orqanları arasında körpü rolunu oynayacaq.
Bu, həmçinin mübahisəli məsələlərin məhkəmə instansiyası vasitəsilə həll olunmasından qaçmağa imkan yaradacaq. DGK sədri sahibkarların fəaliyyətinə maneçilik törədən problemlər və gömrük əməkdaşları barədə görülmüş tədbirlər haqqında məlumat verib.
1995-2007-ci illərdə gömrük orqanlarından 1700 nəfər qovulub. 600 nəfərdən çox əməkdaş attestasiyagdan keçə bilməyib, amma qovulanların böyük hissəsi pozuntuya yol vermiş sıravi gömrük işçiləridir. Əliyev bildirib ki, 12 il ərzində 2300-dən çox gömrük işçisi inzibati və cinayət məsuliyyətinə cəlb olunub.
DGK sədri sahibkarlarla əməkdaşlığı qaydaya salmaq istəyini bildirib.
