Azərbaycan, Bakı/ Trend müxbir İ.Xəlilova/ Beynəlxalq Maliyyə Korporasiyası (BMK) Azərbaycanda biznes mühitinin yaxşılaşdırılması üçün orta müddətli tədbirlər müəyyənləşdirib. BMK-nın Azərbaycandakı nümayəndəsi Aliyə Əzimovanın bildirdiyinə görə, ölkə hökumətinə biznesin qeydiyyatından başlamaq tövsiyə olunub. Növbəti mərhələdə investorların hüquqlarının müdafiəsi və lisenziyalaşdırma üzrə işlər aparılacaq.
Lisenziyalaşdırma istiqamətində işlər dedikdə, inzibati əngəllərin aradan qaldırılması, lisenziya əsasında göstərilən fəaliyyət növlərinin siyahısının azaldılması, icazə alınması prosedurunun sadələşdirilməsi nəzərdə tutulur.
Əzimova qeyd edib ki, Doing Business qrupu həmçinin Azərbaycanda pis göstəricilərdən biri olan gömrük işinin təkmilləşdirirlməsində də iştirak edəcək. Biznes mühitinin yaxşılaşdırılmasında bu da çox mühüm amillərdəndir.
"Doing Business"-2007 hesabatında biznes üçün şərtlərin sadəliyi səviyyəsi üzrə 175 ölkənin (ötən ilə nisbətən 20 ölkə çox) reytinqi göstərilib. Sonuncu hesabata görə, Azərbaycan 99-cu yeri tutub.