Azərbaycan, Bakı /müx. Trend İ.Xəlilova / Azərbaycanın iki yeni bankı - "Pasha Bank" və "Avrasiya Bank" Azərbaycanın Ədliyyə Nazirliyində dövlət qeydiyyatından keçirlər. Bu barədə Azərbaycan Milli Bankının bank nəzarəti departamentinin rəhbəri Adışirin Qasımov məlumat verib. Onun sözlərinə görə, bu iki bank artıq Milli Bankın ilkin razılığını alıblar.
Bank qanunvericiliyinə əsasən, Milli Banka sənədlərin verilməsindən bank fəaliyyəti üçün lisenziya alınmasınadək olan prosedur üçün altı ay vaxt verilir. Qasımovun sözlərinə görə, "Pasha Bank" və "Avrasiya Bank" artıq 2-3 aydır ki, iş aparırlar. Yeni yaradılan banklara qoyulan əsas tələblərdən biri nizamnamə kapitalının 10 mln. manatdan az olmamaq şərti ilə formalaşdırılmasıdır. Milli Bank nümayəndəsinin sözlərinə görə, onların təklifləri bu məbləği üstələyir.
Bu banklardan başqa, son zamanlar Azərbaycanda xarici bankların fəaliyyətə başlaması planları haqda bəyanatlar verilib. Bunlar Almaniyanın "Commerz Bank", Rusiyanın "Vneştorqbank" və Fransanın "Societe General" bankıdır. Lakin bu banklardan Milli Banka hələlik rəsmi müraciətlər olunmayıb. "Commerz Bank" Bakıda öz nümayəndəliyini açmağı planlaşdırır. Bu gün ölkədə 44 bank fəaliyyət göstərir. Lakin "Poct bank" Milli Banka hesabatını vermir.