Azərbaycan, Bakı /müx. Trend İ.Xəlilova / Azərbaycan Milli Bankı (AMB) ixtiyarında olan rəsmi valyuta ehtiyatlarının idarəedilməsi üçün xarici menecerlərin siyahısının 2007-ci ilin sonunadək genişlənəcəyini gözləyir. Bu barədə AMB İdarə Heyətinin sədr müavini Aftandil Babayev məlumat verib. Hazırda Dünya Bankının xəzinədarlığı məsləhətləşmələr və ehtiyatların idarəedilməsi üçillik proqram çərçivəsində AMB-yə aktivlərin idarəedilməsində potensialın artırılmasında texniki yardım göstərir.
"Biz iki istiqamətdə iş aparırıq. Xarici menecerlərin qiymətləndirilməsi istiqamətində iş aparılır və görüşlər keçirilir, habelə dünya maliyyə bazarlarında AMB-nin qiymətli kağızlarla əməliyyatlarının gerçəkləşdirilməsi istiqamətində potensialın artırılması üçün iş görülür" - deyə Babayev bildirib.
AMB rəhbəri Elman Rüstəmov əvvəllər bildirmişdi ki, xarici menecerlərə idarəedilməsi üçün daha $200 mln. verilə bilərdi və portfelin real olaraq $0,5 mlrd. çatdırılması mümkün olardı.
Bu gün üç menecer - Dünya Bankının xəzinədarlığı, İsveçrənin "UBS" bankının və ABŞ-ın "JP Morgan" bankının idarəçiliyində $270 mln. var. Hollandiyanın "ABN Amro" bankı vəsaitlərin idaəedilməsində effektiv iş görmədiyi üçün AMB onunla müqaviləni pozaraq müvafiq vəsaitləri "UBS" bankının idarəçiliyinə verib. Dünya Bankının ixtiyarında $110 mln., "UBS" bankının ixtiyarında - $105 mln., "JP Morgan" bankının ixtiyarında isə - $55 mln. var.
