Azərbaycan, Bakı/ Trend / Dövlət Statistika Komitəsinin məlumatına əsasən Azərbaycanın nəqliyyat sektorunda yanvar-iyul ayları ərzində 93,3 mln. ton müxtəlif yük daşınıb ki, bu da 2006-cı ilin müvafiq dövrü ilə müqayisədə 19,5 faiz çoxdur. Daşınmış yüklərin ümumi həcmindən 66,7 faizi özəl sahənin payına düşüb. Daşınan ümumi yüklərin 47,6 faizi avtomobil nəqliyyatı, 28,6 faizi boru kəmərləri (həmçinin 17,4 faizi Bakı-Tiflis-Ceyhan kəməri ilə), 17,6 faizi dəmiryolu və 6,2 faizi dəniz nəqliyyatı ilə daşınıb.
Yanvar-iyul ayları ərzində sərnişin nəqliyyatı ilə 642,4 mln. nəfər daşınıb. Bu göstərici ötən ilin müvafiq dövründən 7,6 faiz çoxdur. Sərnişindaşımada 83,4 faizi özəl sahənin payına düşüb. Sərnişinlərin 83,5 faizi avtomobil nəqliyyatı və 15,8 faizi metro vasitəsilə daşınıb.
Dəmir yolu nəqliyyatı ilə ötən ildən 7,6 faiz çox, 16,4 mln. ton müxtəlif yük daşınıb. Dəniz nəqliyyatı ilə 5,8 mln. Ton müxtəlif yük daşınıb ki, bu 2006-cı ildən 29,5 faiz azdır. Yükdaşımanın azalmasının səbəbi tranzit yüklərin nəqlinin azalması ilə izah olunur. Ümumi daşınan yüklərin 61,8 faizi neft və neft məhsullarının, qalan hissəsi isə - 38,2 faizi quru yüklərin payıan düşüb. Praktiki olaraq daşınmış yüklərin bütün həcmi beynəlxalq əməliyyatların payına düşüb.
Azərbaycanın limanlarında emal olunmuş yüklərin həcmi yanvar-iyul aylarında 3 mln. ton təşkil edib. Bu ötən ilin müvafiq dövründən 18,5 faiz azdır. Avtomonbil nəqliyyatı ilə 44,4 mln. ton yük daşınıb. Bu həcm 2006-cı ildən 9,1 faiz çoxdur.
536,4 mln. nəfər sərnişin daşınıb. Bu sərmnişinlərin 96,6 faizi avtobus, 3,4 faizi isə minik avtomobilləri ilə daşınıb.
Metropolitenlə sərnişindaşıma 10,9 faiz artmaqla 101,2 mln nəfər təşkil edib. Metropolitenlə daşımalardan gəlir 4,9 mln. manat olub ki, bu da ötən illə müqayisədə 16,7 faiz çoxdur. Hava nəqliyyatı ilə sərnişindaşıma 21,9 faiz artmaqla 859,3 min nəfər təşkil edib. Bu göstəricinin 5,5 faizi özəl sahənin payına düşüb.
Magistral neft kəmərləri ilə daşıma 22,9 mln. ton təşkil edib. Nəqlin 70,7 faizi Bakı -Tiflis-Ceyhan kəmərinin payına düşür. 2007-ci ilin 7 ayı ərzində Ceyhandan 16,2 mln. ton neft göndərilib. Magistral neft kəmərləri ilə neft nəqlinin ümumi həcmi ötən ilin müvafiq dövrü ilə müqayisədə 3,3 dəfə, yükdövriyyəsi 96,5 dəfə artıb. Yeddi ay ərzində magistral qaz kəmərləri ilə 5,1 mlrd. kubmetr qaz nəql olunub. Bu göstərici ötən ildən 14,8 faiz azdır ki, bu da qaz idxalının dayandırılması ilə əlaqədardı.
