Azərbaycan, Bakı/ Trend müxbir İ.Xəlilova/ 100 faiz Azərbaycan Beynəlxalq Bankının təsisçiliyi ilə yaradılan Beynəlxalq Sığorta Şirkəti 2008-ci ilin birinci yarısından gec olmayaraq beynəlxalq reytinq almaq barədə qərar qəbul edib. Bu barədə cümə günü şirkətdən məlumat verilib.
"Bu barədə qərar artıq qəbul olunub. Buna görə də, reytinqin 2007-ci ilin sonuna qədər yaxud 2008-ci ildə alınması mümkündür", - deyə BSŞ-dən bildiriblər.
Beynəlxalq reytinq şirkəti ilə danışıqlar hələ başlamayıb, lakin şirkətdən bunun "Moody`s Investors" olacağını istisna etməyiblər. BSŞ təsisçisi Azərbaycan Beynəlxalq Bankı hazırda "Fitch"-dən uzunmüddətli BB və "Moody`s"-dən Ba2 reytinqinə malikdir.
BSŞ-nin reytinq alınmasına hazırlığı şirkətin menecment sisteminin İsveçrənin "SGS International Certification Services S.A." şirkəti tərəfindən sertifikatlı auditlə də təsdiq olunub. Bu qiymətləndirmədən sonra BSŞ ISO 9001 keyfiyyət sertifikatını alıb.
Şirkətdən qeyd ediblər ki, sertifikatın mövcudluğu şirkətin bir çox bazarlarda uğurları üçün əsas amillərdən biridir və mədəni işgüzar dünyaya məxsus olmasını göstərir.
