Azərbaycan, Bakı / Trend , müxbir İ.Xəlilova / Özəl sektorun inkişafı islam korporasiyası (İCD, İslam İnkişaf Bankının strukturu) ilə birgə Azərbaycanda investisiya şirkətinin yaradılması ilə bağlı bugün sənədlər yekun investisiya qərarının verilməsi üçün Azərbaycan İnvestisiya Şirkətinin (AİŞ) Müşahidə Şurasına təqdim olunacaq. Bu barədə AİŞ-in icraçı direktoru Anar Axundov məlumat verib.
"Sentyabr ayı ərzində müvafiq istiqamətdə iş tam şəkildə keçiriləcək" - deyə Axundov vurğulayıb.
Onun sözlərin görə, hazırda investisiya şirkətinin nizamnamə kapitalının formalaşdırılması məsələsi müzakirə olunur. Bu işdə AİŞ iştirak edəcək. AİŞ-in nizamnamə kapitalında səhm payı 10 faizdən artıq olmayacaq.
İnvestisiya şirkətinin ilkin kapitalının əvvəllər $90-100 mln. civarında olacağı bəyan olunurdu. Lakin Axundov hesab edir ki, $10 mln.-dan başlamaq daha effektlidir.
Bu cür maliyyə institutunun yaradılması təşəbbüsü İslam İnkişaf Bankının prezidenti Əhməd Məhəmməd Əli tərəfindən 2006-cı ilin 8-9 noyabrında Bakıda ərəb institutları və investorlarının iştirakı ilə keçirilən investisiya konfransı çərçivəsində irəli sürülüb.
1992-ci ildən İslam İnkişaf Bankı Azərbaycanda $250 mln. dəyərində 26 layihə maliyyələşdirib. ICD isə Azərbaycan banklarına təxminən $10 mln. həcmində kredit xətləri açıb.
