Azərbaycan, Bakı / Trend , müxbir İ.Xəlilova / Azərbaycanın Maliyyə Nazirliyi xarici valyuta ilə nominallaşdırılmış (avroistiqrazlar) dövlət istiqrazlarının buraxılışı və onların beynəlxalq bazarlarda yerləşdirilməsi ilə bağlı işi sürətləndirib. Cümə axşamı hakimiyyətdən verilən məlumata görə, "Deutsche Bank AG London" və "Citigroup Global Markets Limited" investisiya bankları avrobondların birinci buraxılışı üzrə menecerlər qismində seçiliblər və bu bankların nümayəndələri lazımi məlumatın toplanması məqsədilə Bakıya gəlib. Bu gün Maliyyə Nazirliyi, Milli Bank, Qiymətli Kağızlar üzrə Dövlət Komitəsinin nümayəndələri ilə görüşlərin keçirilməsi planlaşdırılıb.
Avrobondların birinci emissiyası 2007-ci ilin sentyabr-oktyabr aylarına planlaşdırılıb.
"Deutsche Bank AG London" avrobondların buraxılışı üzrə aparıcı menecerin təyin edilməsi üzrə açıq tenderin qalibi olub. Tenderdə 11 aparıcı beynəlxalq investisiya bankı iştirak edib. Tenderdə təklif olunan şərtlərə əsasən "Deutsche Bank" müraciət dövründən etibarən buraxılışın həcminin 0,05% dəyərində və 5 və ya 10 il müddətinə avrobondların buraxılışını təşkil etməyə hazırdır.
Maliyyə Nazirliyi və "Citigroup Global Markets Limited" arasında sentyabrın 30-u 2005-ci il tarixində reytinq məsləhətləşmələrinə dair imzalanmış müqaviləyə əsasən "Citigroup" menecer qismində ilk olaraq seçim hüququ əldə edib. "Deutsche Bank"ın texniki və maliyyə şərtlərini qəbul etməklə "Citigroup" bu işi bankla birgə həyata keçirməli olacaq.
"Citigroup Global Markets Limited" Azərbaycan hökumətinə "Moody's Investors Service"-dən 2005-06-cı illər üçün ikinci beynəlxalq kredit reytinqinin alınması prosesində məsləhətləşmələr həyata keçirib.
Hazırda Azərbaycan "Moody's Investors Service"-dən sentyabrın 14-ü 2006-ci ildə Ba1 və "Fitch Ratings"-dən BB+ səviyyəsində aldığı (5 fevral 2007-ci il) reytinqə malikdir.
Prezidenin 2007-ci il büdcəsinin icrasının təsdiqi ilə bağlı sərəncamında 249 mln. manat həcmində olan avrobondların həyata keçirilməsi nəzərdə tutulub.
