Azərbaycan, Bakı / Trend / Azərbaycan Respublikası Dövlət Neft Şirkətindən verilən məlumata görə, şirkət 200 metr dərinlikdə quyuların şlanq-kabel üsulu ilə qazılması proseslərini həyata keçirmək imkanlarına malik olan "Əli Əmirov" gəmisini modernləşdirilib.
Bu mühəndis-kəşfiyyat gəmisi həm də dalğıc işlərinin icrasında tez-tez istifadə olunur. Belə ki, gəmi təmirdən sonra dalğıcların tənəffüsü üçün sıxılmış havadan istifadə etməklə 60 metrə qədər dərinlikdə, eləcə də tənəffüs üçün hava-helium və helium-oksigen qarışıqlarından istifadə etməklə saturasiya üsulu ilə 10 metr dərinliyə qədər dalğıc və sualtı-texniki işləri yerinə yetirmək imkanına çatdırılmışdır.
Dalğıclar üçün gəmidə sualtı çılçıraqlar, sualtı hidroalətləri işlətmək üçün hidravlik stansiya, sualtı video cihazlar və sualtı elektrooksigen metalkəsən alət quraşdırılıb.
Gəmi ARDNŞ-ın Xəzər Dəniz Neft Donanmasının balansındadır.