Azərbaycan, Bakı / Trend / 2007-ci ildə Azərbaycan Dövlət Neft Şirkəti (ARDNŞ), əməliyyat şirkətləri (ƏŞ) və birgə müəssisələr (BM) ölkənin offşor və anşor yataqlarından 8 mln. 801 min ton neft hisil edib ki, bu da 2006-cı ilin analoji dövrünə nisbətdə 193 min ton azdır. Bu barədə ARDNŞ-dan məlumat verilib.
2007-ci ildə ARDNŞ-ın Neft-Qaz Hasilatı İdarələrinin (NQHİ) dənizdə və quruda neft hasilatı 7 mln. 607 min ton təşkil edib ki, bu da ötən ilin göstəricisindən 166 min ton azdır. BM və ƏŞ-i çərçivəsində xarici şirkətlər ötən il 1 mln. 194 min ton neft hasil edib. Bu göstərici 2006-cı il ilə müqayisədə 27,13 min ton azdır.
Ötən il Azərbaycanda ümumi qaz hasilatı 9 mlrd. 977 mln. kubmetr təşkil edib. Bu 2006-cı ilə nisbətdə 3 mlrd. 147 mln. kubmetr çoxdur. ARDNŞ-ın NQHİ-nin payına 5 mlrd. 853 mln. kubmetr qaz hasilatı düşüb ki, bu da 2006-cı il ilə müqayisədə 1 mlrd. 526 mln. kubmetr çoxdur. Bu dövr ərzində BM və ƏŞ-i 144 mln. kubmetr qaz hasil edib ki, bu da 2006-ci illə müqayisədə 15,44 mln. kubmetr çoxdur.
Azərbaycan Beynəlxalq Əməliyyat Şirkəti (ABƏŞ) 2007-ci ildə "Azəri-Çıraq-Günəşli" yatağından ARDNŞ üçün 2 mlrd. 386 mln. kubmetr səmt qazı hasil edib. Bu göstərici ötən ilə nisbətdə 84 mln. kubmetr çoxdur. Azərbaycanda 57 neft-qaz yatağı mövcuddur. Onlardan 18-i dənizdə, yerdə qalanı isə quruda yerləşir. ARDNŞ-ın əməkdaş ştatı bu gün üçün təxminən 60 min nəfər təşkil edir. 2007-ci ildə Azərbaycanda neft və qaz hasilatı cədvəli bu formadadır:
Neft(min ton) | dekabr | Yanvar - dekabr | ||
2007 | 2007 | 2006 | % | |
Ümumilikdə | 722,12 | 8800,88 | 8993,77 | 97,9 |
ARDNŞ-ın NQHİ-i | 620,31 | 7606,75 | 7772,51 | 97,9 |
BM və ƏŞ | 101,81 | 1194,13 | 1221,26 | 97,8 |
Qaz(mln. m3) | ||||
Ümumilikdə | 985,57 | 9977,31 | 6829,88 | 146,1 |
ARDNŞ-ın NQHİ-i | 601,47 | 5853,53 | 4327,41 | 135,3 |
BM və ƏŞ | 12,45 | 144,02 | 128,58 | 112,0 |
ABƏŞ (ARDNŞ üçün) | 126,92 | 2385,63 | 2301,90 | 103,6 |