Azərbaycan, Bakı, 22 yanvar / Trend , müxbir S.Əliyev / "Azərenerji" Səhmdar Cəmiyyətinin vitse-prezidenti Marlen Əsgərov bildirib ki, fevralın birinci dekadasında Naxçıvan Muxtar Respublikasının Ordubad rayonunda sərhədboyu elektrik stansiyasının tikintisi ilə bağlı İran tərəfi ilə danışıqlar keçiriləcək.
SC artıq tikintinin texniki-iqtisadi əsaslandırmasını hazırlamağa başlayıb.
Layihəyə əsasən, NMR-in Ordubad rayonunda Araz çayı üzərində iki elektrik stansiyası (biri Azərbaycan, digəri İran tərəfində) tikiləcək.
Azərbaycan, təxminən, 35 MVt gücündə elektrik stansiyası tikmək niyyətindədir. Əvvəlcə Azərbaycan 45 MVt gücündə stansiya tikmək istəsə də, İran tərəfi buna nail olmayıb. "Azərenerji"dən verilən məlumata görə, Azərbaycan ərazisində tikiləcək stansiyanın gücü qəti olaraq TİƏ-nin hazırlanmasından sonra təyin ediləcək.
Çayın su ehtiyatı bərabər bölünəcək. Stansiyalar derivasiya tipli olacaq; stansiyalar çayın qollarında yerləşdiriləcək. Su anbarlarının yaradılması nəzərdə tutulmayıb. Stansiyanın suyu başqa məqsədlər üçün istifadə olunmayacaq və su təkrar çaya axıdılacaq.
