Azərbaycan, Bakı. 14 may / Trend / Ilin ilk dörd ayı ərzində Dövlət neft şirkəti (ARDNŞ) tərəfindən "Günəşli" yatağında ümumilikdə 2,1 milyard kubmetr qaz hasil edilib ki, bunun da 1,9 milyard kubmetri dövlətə təhvil verilib. 2007-ci ilin ilk dörd ayında qazın hasilat və təhvil göstəriciləri müvafiq olaraq 1,3 və 1,2 milyard kubmetr təşkil etmişdi. Ötən illə müqayisədə bu sahədə 62% artıma nail olunub.
İlin əvvəlindən başlayaraq "Günəşli" yatağında gündəlik 17,5 milyon kubmetr qaz hasil olunur. Ötən ilin eyni dövründə bu rəqəmlər müvafiq olaraq 10,9 milyon kubmetr təşkil etmişdi. Ötən il "28 May" NQÇİ 4,5 milyard kubmetr qaz hasil etdiyi halda bu il bu rəqəm 7 milyard kubmetrə çatdırılacaq.
Bunun üçün 4 N-li platformada aşağı təzyiqli qazın yığılması, "Neft Daşları"nda sıxıcı kompressorun genişləndirilməsi nəzərdə tutulub ki, bu da "Günəşli" yatağından çıxarılan qazın miqdarını sutkada 20 milyon kubmetrə çatdırmağa imkan verəcək.
