Azərbaycan, Bakı, 21 may/ Trend , müxbir İ.Xəlilova/ Cənubi Koreyanın Baş naziri Han Sın Sunun (Han Seung -soo) Bakıya səfəri Ələt qəsəbəsində (Bakıya yaxın) 818 MVt gücündə özəl istilik elektrik stansiyasının tikintisi layihəsi üzrə sənədlərin razılaşdırılma prosesinin sürətlənməsinə təsir etməyib.
Nazirliyin İnvestisiya Siyasəti şöbəsinin rəisi Əsgər Ələkbərovun sözlərinə görə, sənədlər üzərində iş davam etdiyindən, Cənubi Koreya hökuməti başçısının səfəri zamanı bu ölkənin Kepko şirkəti ilə saziş bağlanmayıb.
Kepko sazişin bağlanması üçün zəruri olan doqquz sənəd hazırlayıb.Bu sənədlər arasında texniki-iqtisadi əsaslandırma, enerji konversiyası haqqında və torpağın icarəsi haqqında Sazişlər var. Razılaşdırılmış qrafikə əsasən, bünövrənin iyunda qoyulması planlaşdırılıb.
Kepko-nun təklifləri Azərbaycan tərəfindən qəbul edilərsə, elektrik stansiyası 3, - 3,5 il müddətində tikiləcək.
Layihənin dəyəri 640 mln. manat (523 mln. avro) qiymətləndirilir. Layihənin hazırlanmış texniki-iqtisadi əsaslandırmasına əsasən, stansiya iki qaz və bir buxar turbinindən ibarət olacaq. Faydalı iş əmsalı isə 57,27 faiz qiymətləndirilir.
Stansiyada müasir qaz turbinlərindən istifadə nəticəsində 1 kVt/s elektrik enerjisinin alınması üçün 0,185 kubmetr təbii qazdan istifadə etmək nəzərdə tutulur ki, bu da 1 kubmetr qazdan 5,4 kVt/s enerji alınması deməkdir. Stansiyanın 1 kVt gücünün "açar altında" tikintisi üçün 783 manat (640 avro) sərf ediləcək.
Belə layihənin Azərbaycan və bütün post-sovet məkanında birinci dəfə reallaşdırıldığını nəzərə alaraq, layihənin qiymətləndirilməsi üçün İİN beynəlxalq ekspertləri dəvət edib. Fransanın BNP Paribas bankı maliyyə məsləhətçisi, Allen & Overy - hüquqi məsləhətçi, MottMacDonald - texniki və Azərbaycanın MGB yerli hüquqi məsləhətçi kimi cəlb edilib.
Layihənin reallaşdırılması üçün dövlət büdcəsindən vəsait cəlb edilməsi və kreditlərə dövlət zəmanətinin təqdim edilməsi nəzərdə tutulmur. Belə ki, investor bütün xərcləri öz üzərinə götürmək niyyətindədir. Lakin, Kepko ilə imzalanan memoranduma görə, "Azərbaycan İnvestisiya Şirkəti" SC layihədə 25 faiz iştirak payı əldə etməyə hazırdır. AİŞ-in iştirak payı $80 mln. təşkil edəcək. Ümumilikdə Kepko layihənin dəyərinin 30 faizini (bu vəsaitin 25 faizi AİŞ tərəfindən yatırılacaq) cəlb edilmiş kreditlər hesabına maliyyələşdirmək niyyətindədir. Bu layihə üzrə bütün təşkilati sənədlər hazırlıq mərhələsindədirlər və hökumətin qərarından sonra imzalanacaqlar.
Müəlliflə əlaqə saxlamaq üçün elektron ünvan: [email protected]
