Azərbaycan, Bakı, 22 may/ Trend müxbir A.Bədəlova/ ABŞ-ın ölkənin strateji ehtiyatlarının yaradılması üçün neft ixdalını dayandırmaq barədə qərarı xammala olan dünya qiymətlərinin cüzi azalmasına gətirəcək. ABŞ Dövlət Energetik İnformasiya İdarəsinin (EİA) beynəlxalq iqtisadçısı Nasir Xilji (Nasir M. Khilji) belə hesab edir.
Bu həftə prezident Corc Buş 2008 -ci ilin sonunadək idxal hesabına strateji neft ehtiyatlarının doldurulmasının dayandırılması haqqında fərman imzalayıb. ABŞ Konqresi bir müddət əvvəl ölkənin strateji ehtiyatı üçün neft alınmasının müvəqqəti dayandırılması barədə qanun layihəsini təsdiq edilməsi üçün prezidentə təqdim edib. Konqres üzvlərinin rəyinə görə, Energetika Nazirliyinin ehtiyatların doldurulması üçün dünya bazarında neftin alınmasını həyata keçirməsi qiymət artımına səbəb olur. Lakin, Buş özü hesab edir ki, bu tədbir xammala olan qiymətlərin azalmasına səbəb ola bilər.
Xilji cümə axşamı Trend -a bildirib ki, Konqresin idxalı dayandırmaq haqqında qərar qəbul etməsinin səbəbi neft alışının dünyanın gərgin neft bazarında xammala olan əlavə tələbat yaratmasına əminlik olub.
"ABŞ -ın strateji ehtiyatları üçün neft alınmasının dayandırılması neftə olan qiymətlərin hazırki $126 bareldən $2,17 barel azalmaya gətirəcək", - Xilji bildirib.
Xiljinin sözlərinə görə, hazırda ABŞ-ın əmtəə neft ehtiyatları 702 mln. barel təşkil edir. Ölkənin gündəlik tələbatı 21 mln. bareldir. Dünyada neftə olan tələbat sutkada 87 mln. barel təşkil edir.
Amerikanın Energy Security Analysis (ESAI) analitik şirkətinin eksperti Endrü Ridin (Andrew Reed) rəyinə görə, Buşun bu fərmanı imzalamasına seçki kampaniyasının gedişi səbəb olub.
"Benzinin yüksək qiymətləri prezident seçki kampaniyasında, xüsusilə də Demokratik partiyadan namizədlik uğrunda qızğın mübarizədə müzakirə predmeti olub. Buna görə də, belə təşəbbüsün göstərilməsi təəccüblü deyil", - Rid Trend -a bildirib.
"Maraqlıdır ki, hətta bu təşəbbüsü dəstəkləyən və təqdir edənlər, bu tədbirin problemin həlli olmaması ilə razıdırlar", - Rid əlavə edib.
ABŞ Energetika Nazirliyinin proqnozuna görə, 2015-ci ilə ölkənin neft idxalından asılılığı 60 faizdən 50 faizədək azalacaq, lakin 2030-cu ildə yenidən 54 faizədək artacaq. İdxalın azalması 1977-ci ildən bəri ilk dəfədir ki, baş verəcək. ABŞ 2008-ci ilin birinci üç ayında neft idxalını 2007-ci ildəki 58,2 faizdən 57,9 faizədək azaldıblar.
Müəlliflə əlaqə saxlamaq üçün elektron ünvan: [email protected]
