Azərbaycan, Bakı, 23 may/ Trend , müxbir E.İsmayılov/ Azərbaycan Dövlət Neft Şirkətinin "Abşeronneft" Neft-Qaz Çıxartma İdarəsi "Abşeron" yatağında kəşfiyyat quyusunun divarlarının möhkəmləndirilməsi üçün nəzərdə tutulan sütunları quyuya buraxıb. Sütunlar 1866 metr dərinliyə buraxılıb. Bu barədə cümə günü NQÇİ-dən məlumat veriblər. Hazırda quyunun sementləşdirilməsi aparılır.
Bundan əlavə, yataqda "Abşeron - 60" quyusunun mənimsənilməsi üzrə işlər aparılır. Yaxın vaxtlarda quyunun dəliyində kompressorun quraşdırılması planlaşdırılır.
Perspektivdə "Qərbi Abşeron" yatağında yeni N61 kəşfiyyat quyusunun qazılmasına başlamaq planlaşdırılır. Kəşfiyyat qazmasının nəticələrindən asılı olaraq N62 quyusunun qazılıb-qazılmaması aydın olacaq.
Bu iki kəşfiyyat quyusunun qazılması yataqdan çıxarılan ehtiyatların dəqiqləşdirilməsi üçün lazımdır. Cəlbedici karbohidrogen ehtiyatları aşkar edildiyi halda, sahədə istismar quyuları qazılacaq, neft hasilatı üçün platforma quraşdırılacaq.
Yataqda ehtiyatların qiymətləndirilməsi göstərib ki, burada neft ekvivalenti ilə 10 mln. tondan çox karbohidrogenin olması mümkündür. Ehtiyatların qiymətləndirilməsi kəşfiyyat xarakterli qazmadan sonra aparılıb. Əvvəllər yataqda neft ekvivalenti ilə 5 mln. ton karbohidrogen olduğu güman edilirdi.
Müəlliflə əlaqə saxlamaq üçün elektron ünvan: [email protected]
