Azərbaycan, Bakı, 03 iyun / Trend , müxbir S.Əliyev/ Azərbaycan Dövlət Neft Şirkəti (ARDNŞ) Türkiyənin "Tekfen Holding" tikinti holdinqində iştirak payı əldə etmək üçün imkanları qiymətləndirir. Bu barədə jurnalistlərə çərşənbə axşamı "Xəzər neft-qaz - 2008" sərgisinin açılışında ARDNŞ prezidenti Rövnəq Abdullayev bildirib.
"ARDNŞ mütəxəssisləri "Tekfen Holding"də iştirak payı əldə etmək üçün müzakirələr aparır, təklifləri öyrənirlər", - deyə ARDNŞ prezidenti bildirib. ARDNŞ "Tekfen Holding"in tərkibinə daxil olan "Tekfen Inshaat"da səhmlərin 50 faizini əldə etmək niyyətindədir.
ARDNŞ Türkiyənin tikinti şirkətində iştirak payı əldə etməklə bu ölkədə öz iri infrastruktur layihələrini reallaşdırmağı planlaşdırır. Bu, ARDNŞ-ın Ceyhan limanında neft emalı zavodu tikmək niyyəti ilə də bağlıdır. Şirkət Azərbaycanda neft emalı, kimya məhsulları istehsalının da daxil olacağı iri neft emalı kompleksinin tikintisinə də cəlb edilə bilər. Bundan əlavə, ARDNŞ-ın iştirakı ilə şirkətlər alyansı Türkiyənin "Petkim" iri neft kimya holdinqi səhmlərinin 51 faizini əldə edib. Tikinti şirkəti bu layihəyə də cəlb edilə bilər.
ARDNŞ-dan bazar ertəsi bildirildiyinə görə, ARDNŞ və Türkiyənin "Tekfen Holding" şirkəti niyyət protokolu imzalayıb. Bu sənəddə ARDNŞ Türkiyənin tikinti holdinqində iştirak payı əldə etmək barədə niyyətini ifadə edir.
ARDNŞ və "Tekfen" artıq Azərbaycanda əməkdaşlıq edir. Şirkətlər BP-nin operatoru olduğu "Azəri-Çıraq-Günəşli" yatağının tammiqyaslı işlənməsi çərçivəsində layihələrin reallaşdırılmasında iştirak edən "Azfen" Birgə Müəssisəsini yaradıb. Bu, platformaların tikintisi və Səngəçal terminalının genişləndirilməsinə aiddir.