Azərbaycan, Bakı, 05 iyun / Trend , müxbir E.İsmayılov, A.Bədəlova/ Azərbaycan ixrac boru kəmərinin işi dayandırılacağı təqdirdə, fasiləsiz qaz hasilatını təmin emək məqsədilə əlavə qaz anbarının tikintisini nəzərdən keçirir.
ARDNŞ-ın geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadə cümə axşamı jurnalistlərə bildirib ki, yeni qaz anbarı ehtiyatları kifayət qədər olan "Bahar" qaz yatağı bazasında yaradıla bilər. "Bahar" yatağının işlənməsi ilə ARDNŞ müstəqil məşğul olur.
"Qaz anbarının gücü 5-6 mlrd. kub metr təşkil edərsə, bu kifayətdir", - deyə Yusifzadə bildirib. Vitse-prezident yeni qaz anbarının 10 mlrd. kub metr olmasını daha səmərəli adlandırıb.
Hazırda Azərbaycan "Qaradağ" və "Kalmaz" - iki yeraltı qaz anbarını istismar edir. Ötən il sözügedən qaz anbarlarına 1 mlrd. kub metrdən artıq qaz vurulub. Bu qaz həcmi 2007-2008-ci ilin payız-qış dövründə ölkə abonentlərini təmin etmək üçün istifadə olunub. Ötən dövr (2006-2007-ci illər) qaz anbarlarına 1,024 mlrd. kub metr qaz vurulmuşdu.
Azərbaycanda qaz hasilatı ilə ARDNŞ məşğul olur. Şirkət yataqlarda yanacaq istehsalını öz şəxsi vəsaitləri hesabına reallaşdırır. ARDNŞ-ın hasil etdiyi qazın böyük hissəsi Azərbaycanın daxili bazarının tələbatını təmin etmək üçün yönəlib, sutkada təxminən 1,5 mln. kub metr qaz isə hazırda Gürcüstana ixrac olunur.
"BP"nin texniki operatorluğu altında ARDNŞ-ın iştirakı ilə qaz xarici tərəfdaşlarla birgə həmçinin "Şahdəniz" yatağında hasil olunur. Qaz Azərbaycan bazarına çıxarılır, həmçinin Cənubi-Qafqaz qaz kəmərilə Gürcüstan və Türkiyəyə ixrac olunur.
Müəlliflə əlaqə saxlamaq üçün elektron ünvan: [email protected]