Azərbaycan, Bakı, 14 iyun / Trend , müxbir S.Əliyev/ "Şahdəniz" qaz kondensat yatağında quraşdırılan TPG-500 platformasından (Beşinci istismar) yeni quyunun qazma işləri sentyabrın əvvəlində başa çatacaq. Bundan sonra yataqda potensial hasilat sutkada 26-27 mln. kub metrə qədər artacaq. Bu barədə şənbə günü hökumətdən bildiriblər.
Bu gün "Şahdəniz" yatağından qaz hasilatı sutkada 21-22 mln. kub metr təşkil edir. Bu həcmdən sutkada təxminən 14 mln. kub metr Türkiyə, 6 mln. kub metrdən çox qazı isə Azərbaycan əldə edir. Təxminən 400-500 min kub metr qaz Gürcüstana göndərilir və analoji həcm yanacaq qismində Bakı-Tbilisi-Ceyhan boru kəməri üzrə nasos stansiyalarına verilir.
"Şahdəniz" dəniz yatağının işlənməsi üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) -25,5, "Statoil Hydro" - 25,5 faiz, "NICO" - 10 faiz, "Total" - 10 faiz, "LukAgip" - 10 faiz, "TPAO" - 9 faiz, ARDNŞ - 10 faiz.
Bu yataqda qaz hasilatına 2006-cı ilin dekabrında başlanıb. Hazırda qaz Gürcüstan və Türkiyəyə Cənubi Qafqaz boru kəməri ilə nəql olunur. Həmçinin Azərbaycan da qaz alıcısı qismində çıxış edir.
Yatağın işlənməsi üzrə birinci mərhələ çərçivəsində hər il 8,8 mlrd. kub metr qazın hasil edilməsi nəzərdə tutulub. Bu həcm Azərbaycan, Gürcüstan və Türkiyəyə satılacaq. Reallaşdırılmasına 2012-ci ildən sonra başlanacaq ikinci mərhələ çərçivəsində hasilat 20 mlrd. kub metrə qədər artırılacaq.
Məqalə müəllifi ilə əlaqə ünvanı: [email protected]
