Azərbaycan, Bakı, 21 iyul/ Trend , müxbir E.İsmayılov/ Bakı-Tbilisi-Ceyhan boru kəmərinin buraxma qabiliyyətinin genişləndirilməsi üzrə işlərin ilin sonunadək tamamilə başa çatdırılması planlaşdırılır. Bu barədə bazar ertəsi layihəyə yaxın mənbə məlumat verib. Kəmərin genişləndirilməsi üzrə tikinti işləri sentyabrda başa çatacaq.
Boru kəmərinin buraxma qabiliyyəti layihədə nəzərdə tutulmuş 1 mln. bareldən 1,2 mln. barelədək artırılacaq. Hazırda Azərbaycan, Gürcüstan və Türkiyədə nasos stansiyalarında işlər aparılır.
Bakı-Tbilisi-Ceyhan (BTC) neft kəmərinin buraxma qabiliyyətinin 1 mln. bareldən 1,2 mln. barelədək genişləndirilməsinin dəyəri $69 mln. qiymətləndirilir. Bu vəsaitlər hesabına boru kəmərində inqibatorların (kimyəvi reagentlər) tətbiqi üçün avadanlıq quraşdırılacaq.
Hazırda boru kəməri ilə sutkada 800 min bareldən çox neft nəql olunur. İlin sonunadək bu göstərici sutkada 1 mln. barelə çatdırılacaq.
2007-ci ilin aprelindən etibarən, yüngül Azərbaycan nefti dünya bazarlarına, əsasən, BTC boru kəməri ilə çatdırılır. 2007-ci il ərzində bu neft kəməri ilə 28 mln. ton neft nəql edilib. Neftin BTC ilə ixracı başlanandan, kəmərlə 45 mln. tondan çox neft ixrac edilib.
BTC neft kəmərinin ümumi uzunluğu 1768 kilometrdir. Bunun 443 km-i Azərabaycan, 249 km -i Gürcüstan, 1076 km-i Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə, 2005-ci il mayın 18-də başlayıb.
BTC-nin tikintisi $4 mlrd. başa gəlib. Bu, tikinti işləri, boru kəmərinin doldurulmasına çəkilən xərclərdir. Maliyyə xərcləri və bank faizlərinin ödənilməsi bura daxil deyil. Ümumi maliyyə kreditinin məbləği $2,6 mlrd. təşkil edir. BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz ); Statoil (8,71 faiz ); TRAO (6,53 faiz ); Eni (5 faiz ); Total (5 faiz ); Itochu (3,40 faiz ); Inpex (2,50 faiz ); ConocoPhillips (2,50 faiz ) və Amerada Hess (2,36 faiz ).
Müəlliflə əlaqə saxlamaq üçün elektron ünvan: [email protected]